ದೆಹಲಿ:ಕರ್ನಾಟಕ ಕೃಷಿ ಸಚಿವ ಎನ್. ಚಲುವರಾಯಸ್ವಾಮಿ ಅವರು ಇಂದು ದೆಹಲಿಯಲ್ಲಿ ನಡೆದ ಭಾರತೀಯ ಕೃಷಿ ಸಂಶೋಧನಾ ಮಂಡಳಿಯ (ಐಸಿಎಆರ್) ಆಡಳಿತ ಮಂಡಳಿ ಸಭೆಯಲ್ಲಿ ರಾಜ್ಯದ ಕೃಷಿ ವಲಯವನ್ನು ಬಲಪಡಿಸುವ ನವೀನ ಯೋಜನೆಗಳನ್ನು ಪ್ರಸ್ತಾಪಿಸಿದರು.
ಸಭೆಯನ್ನುದ್ದೇಶಿಸಿ ಮಾತನಾಡಿದ ಸಚಿವರು, “ಕರ್ನಾಟಕವು ಕೃಷಿ ನಾವೀನ್ಯತೆಯಲ್ಲಿ ಮುಂಚೂಣಿಯಲ್ಲಿದೆ. ರೈತ ಕೇಂದ್ರಿತ, ಆಧುನಿಕ ಮತ್ತು ಹವಾಮಾನ-ತಡೆಗಟ್ಟುವ ಕೃಷಿ ವ್ಯವಸ್ಥೆಯನ್ನು ರೂಪಿಸಲು ಐಸಿಎಆರ್‌ನ ಸಹಕಾರ ಅತ್ಯಗತ್ಯ” ಎಂದು ಒತ್ತಿ ಹೇಳಿದರು.
ರಾಗಿ, ರಬಿ, ಜೋಳ ಮತ್ತು ತೊಗರಿಗೆ ಕನಿಷ್ಠ ಬೆಂಬಲ ಬೆಲೆ (ಎಂಎಸ್‌ಪಿ), ಇ-ನಾಮ್ ಮೂಲಕ ರೈತ ಉತ್ಪಾದಕ ಸಂಸ್ಥೆಗಳಿಗೆ (ಎಫ್‌ಪಿಒ) ಮಾರುಕಟ್ಟೆ ಸಂಪರ್ಕ, ರಾಗಿ, ಒಣ ಬೇಸಾಯ, ತೋಟಗಾರಿಕೆ, ಔಷಧೀಯ ಸಸ್ಯಗಳು ಮತ್ತು ಆಹಾರ ಸಂಸ್ಕರಣೆಗೆ ಐಸಿಎಆರ್-ರಾಜ್ಯ ಸಹಭಾಗಿತ್ವದ ಸಂಶೋಧನಾ ಸಂಸ್ಥೆಗಳ ಸ್ಥಾಪನೆಯನ್ನು ಸಚಿವರು ಕೋರಿದರು.
ಇದರ ಜೊತೆಗೆ, ಕೃಷಿ ವಿಶ್ವವಿದ್ಯಾಲಯಗಳಿಗೆ ಖಾಸಗಿ ಧನಸಹಾಯದ ಮೇಲೆ ಜಿಎಸ್‌ಟಿ ವಿನಾಯಿತಿ, ಕೃಷಿ ಸ್ಟಾರ್ಟ್‌ಅಪ್‌ಗಳಿಗೆ ಬೀಜ ನಿಧಿ, ಇನ್‌ಕ್ಯುಬೇಶನ್ ಕೇಂದ್ರಗಳ ಸ್ಥಾಪನೆ, ಹಾಸ್ಟೆಲ್ ಮತ್ತು ಪ್ರಯೋಗಾಲಯಗಳಿಗೆ ಹೆಚ್ಚಿನ ಅನುದಾನ, ಡಿಜಿಟಲ್ ಕ್ಲಾಸ್‌ರೂಮ್‌ಗಳು, ಎಆರ್/ವಿಆರ್ ಉಪಕರಣಗಳು ಮತ್ತು ಐಒಟಿ-ಸಕ್ರಿಯ ಸ್ಮಾರ್ಟ್ ಲ್ಯಾಬ್‌ಗಳ ಮೂಲಕ ಆಧುನಿಕ ಸಂಶೋಧನೆಗೆ ಕೇಂದ್ರದ ಬೆಂಬಲವನ್ನು ಕೋರಿದರು.
ಕೃಷಿ ವಿಜ್ಞಾನ ಕೇಂದ್ರಗಳ (ಕೆವಿಕೆ) ವಿಷಯ ತಜ್ಞರ (ಎಸ್‌ಎಂಎಸ್) ಹುದ್ದೆಗಳನ್ನು ಸಹಾಯಕ ಪ್ರಾಧ್ಯಾಪಕರಿಗೆ ಸಮಾನಗೊಳಿಸುವ ಪ್ರಸ್ತಾವವನ್ನು ಮಂಡಿಸಿದ ಅವರು, ಇದರಿಂದ ರಾಜ್ಯ ಸರ್ಕಾರಗಳ ಮೇಲಿನ ಆರ್ಥಿಕ ಒತ್ತಡ ಕಡಿಮೆಯಾಗಲಿದೆ ಎಂದು ತಿಳಿಸಿದರು.
ಕರ್ನಾಟಕದ ಮಣ್ಣಿನ ಆರೋಗ್ಯಕ್ಕಾಗಿ ಐಸಿಎಆರ್ ಟಾಸ್ಕ್ ಫೋರ್ಸ್ ಮತ್ತು ನಿಧಿ, ಸಾವಯವ ಹಾಗೂ ಸಿರಿಧಾನ್ಯ ಅಭಿಯಾನಕ್ಕೆ ರಾಷ್ಟ್ರೀಯ ಮನ್ನಣೆ, ಕೃಷಿ ಭಾಗ್ಯ ಮತ್ತು ರೈತ ಸಿರಿ ಯೋಜನೆಗಳೊಂದಿಗೆ ಐಸಿಎಆರ್ ಯೋಜನೆಗಳ ಸಮನ್ವಯ, ಮತ್ತು ಪಿಎಂಎಫ್‌ಎಂಇ ಯೋಜನೆಯಡಿ ಒಂದು ಜಿಲ್ಲೆ ಒಂದು ಉತ್ಪನ್ನ ಕ್ಲಸ್ಟರ್‌ಗೆ ಕೇಂದ್ರದ ನೆರವನ್ನು ಸಚಿವರು ಒತ್ತಾಯಿಸಿದರು.
ಸಭೆಯ ಸಂದರ್ಭದಲ್ಲಿ, ಕೇಂದ್ರ ಕೃಷಿ ಸಚಿವ ಶಿವರಾಜ್ ಸಿಂಗ್‌ ಚೌವ್ಹಾಣ್‌ ಅವರನ್ನು ಮೈಸೂರು ಪಾಕ್‌, ರೇಶ್ಮೆ ಶಾಲು, ಸೀರೆ ಮತ್ತು ನೇಗಿಲುಗಳನ್ನು ನೀಡಿ ಗೌರವಿಸಲಾಯಿತು.
