ನವದೆಹಲಿ: ಭಾರತದ ಚುನಾವಣಾ ಆಯೋಗವು ಮತದಾರರ ಒಟ್ಟು ಶೇಕಡಾವಾರು ಪ್ರವೃತ್ತಿಗಳನ್ನು ತ್ವರಿತವಾಗಿ ನವೀಕರಿಸಲು ತಂತ್ರಜ್ಞಾನ ಆಧಾರಿತ, ಸರಳೀಕೃತ ವ್ಯವಸ್ಥೆಯನ್ನು ಜಾರಿಗೆ ತರುತ್ತಿದೆ. ಈ ಹೊಸ ಪ್ರಕ್ರಿಯೆಯು ಹಿಂದಿನ ಕೈಯಾರೆ ವರದಿ ವಿಧಾನಗಳಿಗೆ ಸಂಬಂಧಿಸಿದ ಸಮಯದ ವಿಳಂಬವನ್ನು ಗಣನೀಯವಾಗಿ ಕಡಿಮೆ ಮಾಡಲಿದೆ. ಈ ಉಪಕ್ರಮವು ಸಾರ್ವಜನಿಕ ದತ್ತಾಂಶವನ್ನು ಸಮಯಕ್ಕೆ ಸರಿಯಾಗಿ ಒದಗಿಸುವ ಆಯೋಗದ ಬದ್ಧತೆಗೆ ಸನ್ನದ್ದವಾಗಿದೆ, ಇದನ್ನು ಮುಖ್ಯ ಚುನಾವಣಾ ಆಯುಕ್ತ ಶ್ರೀ ಗ್ಯಾನೇಶ್ ಕುಮಾರ್ ಅವರು ಹಲವು ಸಂದರ್ಭಗಳಲ್ಲಿ ಒತ್ತಿಹೇಳಿದ್ದಾರೆ.
1961ರ ಚುನಾವಣಾ ನಡವಳಿಕೆ ನಿಯಮಗಳ Rule 49Sನ ಕಾನೂನು ಚೌಕಟ್ಟಿನಡಿ, ಮತಗಟ್ಟೆ ಅಧಿಕಾರಿಗಳು (PROs) ಮತ ದಾಖಲಾತಿಯ ವಿವರಗಳನ್ನು ಒಳಗೊಂಡಿರುವ Form 17Cಯನ್ನು, ಮತಗಟ್ಟೆಯಲ್ಲಿ ಮತದಾನ ಮುಕ್ತಾಯದ ಸಂದರ್ಭದಲ್ಲಿ ಹಾಜರಿರುವ ಅಭ್ಯರ್ಥಿಗಳಿಂದ ನಾಮನಿರ್ದೇಶನಗೊಂಡ ಏಜೆಂಟ್‌ಗಳಿಗೆ ಒದಗಿಸಬೇಕು. ಈ ಕಾನೂನು ಅವಶ್ಯಕತೆಯಲ್ಲಿ ಯಾವುದೇ ಬದಲಾವಣೆಯಿಲ್ಲದಿದ್ದರೂ, ಸಾರ್ವಜನಿಕರಿಗೆ ಮತದಾರರ ಒಟ್ಟು ಶೇಕಡಾವಾರು ಪ್ರವೃತ್ತಿಗಳ ಬಗ್ಗೆ ಮಾಹಿತಿ ನೀಡಲು ಸಹಾಯಕವಾಗಿರುವ, ಗೈರ್-ಕಾನೂನಿನ ವಿಧಾನವಾದ VTR ಆಪ್ ನವೀಕರಣ ಪ್ರಕ್ರಿಯೆಯನ್ನು ಈಗ ಸರಳಗೊಳಿಸಲಾಗುತ್ತಿದೆ.
ಈ ಹೊಸ ಉಪಕ್ರಮದಡಿಯಲ್ಲಿ, ಪ್ರತಿ ಮತಗಟ್ಟೆಯ ಮತಗಟ್ಟೆ ಅಧಿಕಾರಿಯು (PRO) ಮತದಾನದ ದಿನದಂದು ಪ್ರತಿ ಎರಡು ಗಂಟೆಗಳಿಗೊಮ್ಮೆ ECINET ಆಪ್‌ನಲ್ಲಿ ಮತದಾರರ ಒಟ್ಟು ಶೇಕಡಾವಾರು ಮಾಹಿತಿಯನ್ನು ನೇರವಾಗಿ ನಮೂದಿಸುವರು, ಇದರಿಂದ ನವೀಕರಣದ ಸಮಯದ ವಿಳಂಬ ಕಡಿಮೆಯಾಗಲಿದೆ. ಈ ಮಾಹಿತಿಯು ಕ್ಷೇತ್ರ ಮಟ್ಟದಲ್ಲಿ ಸ್ವಯಂಚಾಲಿತವಾಗಿ ಸಂಗ್ರಹಗೊಳ್ಳುತ್ತದೆ. ಈಗಲೂ ಒಟ್ಟು ಮತದಾನದ ಶೇಕಡಾವಾರು ಪ್ರವೃತ್ತಿಗಳನ್ನು ಪ್ರತಿ ಎರಡು ಗಂಟೆಗಳಿಗೊಮ್ಮೆ ಪ್ರಕಟಿಸಲಾಗುವುದು. ವಿಶೇಷವಾಗಿ, ಮತದಾನ ಮುಕ್ತಾಯದ ತಕ್ಷಣವೇ PROಗಳು ಮತಗಟ್ಟೆಯಿಂದ ಹೊರಡುವ ಮೊದಲು ECINETನಲ್ಲಿ ಮಾಹಿತಿಯನ್ನು ನಮೂದಿಸುವರು, ಇದರಿಂದ ವಿಳಂಬ ಕಡಿಮೆಯಾಗಿ, ಮತದಾನ ಮುಕ್ತಾಯದ ನಂತರ ಕ್ಷೇತ್ರವಾರು ಒಟ್ಟು ಮತದಾನದ ಶೇಕಡಾವಾರು ಮಾಹಿತಿಯು ನವೀಕೃತ VTR ಆಪ್‌ನಲ್ಲಿ ಲಭ್ಯವಾಗಲಿದೆ, ಇದು ಜಾಲ ಸಂಪರ್ಕಕ್ಕೆ ಒಳಪಟ್ಟಿರುತ್ತದೆ. ಮೊಬೈಲ್ ಜಾಲವಿಲ್ಲದ ಸ್ಥಳಗಳಲ್ಲಿ, ಆಫ್‌ಲೈನ್‌ನಲ್ಲಿ ನಮೂದು ಮಾಡಿ, ಸಂಪರ್ಕ ಲಭ್ಯವಾದಾಗ ಸಿಂಕ್ ಮಾಡಬಹುದು. ಈ ನವೀಕೃತ VTR ಆಪ್ ಬಿಹಾರ ಚುನಾವಣೆಗೆ ಮುನ್ನ ECINETನ ಅವಿಭಾಜ್ಯ ಭಾಗವಾಗಲಿದೆ.
ಹಿಂದೆ, ಮತದಾರರ ಒಟ್ಟು ಶೇಕಡಾವಾರು ಮಾಹಿತಿಯನ್ನು ಸೆಕ್ಟರ್ ಅಧಿಕಾರಿಗಳು ಕೈಯಾರೆ ಸಂಗ್ರಹಿಸಿ, ಫೋನ್ ಕರೆ, SMS ಅಥವಾ ಸಂದೇಶ ಆಪ್‌ಗಳ ಮೂಲಕ ರಿಟರ್ನಿಂಗ್ ಅಧಿಕಾರಿಗಳಿಗೆ (ROs) ರವಾನಿಸುತ್ತಿದ್ದರು. ಈ ಮಾಹಿತಿಯನ್ನು ಪ್ರತಿ ಎರಡು ಗಂಟೆಗಳಿಗೊಮ್ಮೆ ಸಂಗ್ರಹಿಸಿ VTR ಆಪ್‌ಗೆ ಅಪ್‌ಲೋಡ್ ಮಾಡಲಾಗುತ್ತಿತ್ತು. ಆದರೆ, ಭೌತಿಕ ದಾಖಲೆಗಳು ರಾತ್ರಿ ವೇಳೆಗೆ ಅಥವಾ ಮರುದಿನವೇ ತಲುಪುತ್ತಿದ್ದರಿಂದ, ಶೇಕಡಾವಾರು ಪ್ರವೃತ್ತಿಗಳ ನವೀಕರಣವು 4-5 ಗಂಟೆಗಳಿಗಿಂತಲೂ ಹೆಚ್ಚು ವಿಳಂಬವಾಗುತ್ತಿತ್ತು, ಇದರಿಂದ ಕೆಲವರಲ್ಲಿ ತಪ್ಪು ಗ್ರಹಿಕೆ ಉಂಟಾಗುತ್ತಿತ್ತು.
