ದಾವಣಗೆರೆ: ಮಾಹಿತಿ ಹಕ್ಕು ಕಾಯಿದೆ (RTI) ಆಡಳಿತದಲ್ಲಿ ಪಾರದರ್ಶಕತೆ, ಜವಾಬ್ದಾರಿಕೆ ಮತ್ತು ಭ್ರಷ್ಟಾಚಾರ ನಿಯಂತ್ರಣಕ್ಕೆ ಗಣನೀಯ ಕೊಡುಗೆ ನೀಡಿದ್ದು, ಸಾರ್ವಜನಿಕರ ಸಹಭಾಗಿತ್ವವನ್ನು ಹೆಚ್ಚಿಸಿದೆ. ದಾವಣಗೆರೆ ಜಿಲ್ಲೆಯಲ್ಲಿ 559 ಎರಡನೇ ಮೇಲ್ಮನವಿ ಪ್ರಕರಣಗಳು ಬಾಕಿಯಿದ್ದು, ಇವುಗಳ ಶೀಘ್ರ ಇತ್ಯರ್ಥಕ್ಕಾಗಿ ನವೆಂಬರ್‌ನಲ್ಲಿ ಜಿಲ್ಲಾ ಮಟ್ಟದಲ್ಲಿ ಅದಾಲತ್ ಮಾದರಿಯ ಕಲಾಪ ನಡೆಸಲು ಮಾಹಿತಿ ಹಕ್ಕು ಆಯೋಗ ಉದ್ದೇಶಿಸಿದೆ ಎಂದು ಆಯೋಗದ ಆಯುಕ್ತರಾದ ರುದ್ರಣ್ಣ ಹರ್ತಿಕೋಟೆ ಮತ್ತು ರಾಜಶೇಖರ್ ತಿಳಿಸಿದ್ದಾರೆ.
ಶನಿವಾರ ಜಿಲ್ಲಾಧಿಕಾರಿಗಳ ಕಚೇರಿಯ ತುಂಗಭದ್ರಾ ಸಭಾಂಗಣದಲ್ಲಿ ಸಾರ್ವಜನಿಕ ಮಾಹಿತಿ ಅಧಿಕಾರಿಗಳು ಮತ್ತು ಪ್ರಥಮ ಮೇಲ್ಮನವಿ ಪ್ರಾಧಿಕಾರಿಗಳಿಗೆ ಆಯೋಜಿಸಲಾದ ತರಬೇತಿ ಕಾರ್ಯಗಾರದ ನಂತರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಆಯುಕ್ತರು, ರಾಜ್ಯ ಮಾಹಿತಿ ಆಯೋಗದಲ್ಲಿ 10 ಆಯುಕ್ತರು ಮತ್ತು ಒಬ್ಬ ಮುಖ್ಯ ಆಯುಕ್ತರಿದ್ದಾರೆ. ರಾಜ್ಯದಲ್ಲಿ ಒಟ್ಟು 56,000 ಎರಡನೇ ಮೇಲ್ಮನವಿ ಪ್ರಕರಣಗಳಿದ್ದು, ಸತತ ಕಲಾಪಗಳ ಮೂಲಕ ಇವು 46,446ಕ್ಕೆ ಇಳಿಕೆಯಾಗಿವೆ. ಬೆಂಗಳೂರು ನಗರ ಜಿಲ್ಲೆಯಲ್ಲಿ 11,428 ಪ್ರಕರಣಗಳು ಅತಿ ಹೆಚ್ಚಿದ್ದರೆ, ಕೊಡಗು ಜಿಲ್ಲೆಯಲ್ಲಿ 75 ಪ್ರಕರಣಗಳು ಕನಿಷ್ಠವಾಗಿವೆ. ದಾವಣಗೆರೆ ಜಿಲ್ಲೆ 559 ಪ್ರಕರಣಗಳೊಂದಿಗೆ ರಾಜ್ಯದಲ್ಲಿ ಆರನೇ ಕಡಿಮೆ ಪ್ರಕರಣಗಳ ಜಿಲ್ಲೆಯಾಗಿದೆ.
ಕಾಯಿದೆಯ ಸಮರ್ಥ ಅನುಷ್ಠಾನಕ್ಕೆ ಒತ್ತು
ರುದ್ರಣ್ಣ ಹರ್ತಿಕೋಟೆ ಅವರು, RTI ಕಾಯಿದೆಯಡಿ ಸಲ್ಲಿಕೆಯಾಗುವ ಅರ್ಜಿಗಳಿಗೆ ಲಭ್ಯ ದಾಖಲೆಗಳನ್ನು ಕಡ್ಡಾಯವಾಗಿ ಒದಗಿಸಬೇಕು. ಸೆಕ್ಷನ್ 4(1) ಎ.ಬಿ ಘೋಷಣೆಯನ್ನು ಅನುಸರಿಸಿ ಯೋಜನೆಗಳ ಮಾಹಿತಿಯನ್ನು ಸ್ವಯಂಪ್ರೇರಿತವಾಗಿ ಪ್ರಕಟಿಸಿದರೆ ಅರ್ಜಿಗಳ ಸಂಖ್ಯೆ ಕಡಿಮೆಯಾಗಲಿದೆ. ಸಾರ್ವಜನಿಕ ಮಾಹಿತಿ ಅಧಿಕಾರಿಗಳು (PIO) ನಿಗದಿತ ಸಮಯದಲ್ಲಿ ಮಾಹಿತಿ ನೀಡದಿದ್ದರೆ, ಪ್ರಥಮ ಮೇಲ್ಮನವಿ ಪ್ರಾಧಿಕಾರಕ್ಕೆ ಮನವಿ ಸಲ್ಲಿಸಬಹುದು. ಇಲ್ಲಿಯೂ ನ್ಯಾಯ ಸಿಗದಿದ್ದರೆ, ರಾಜ್ಯ ಮಾಹಿತಿ ಆಯೋಗಕ್ಕೆ ಎರಡನೇ ಮೇಲ್ಮನವಿ ಸಲ್ಲಿಸಬಹುದು. ಆಯೋಗವು ಜಿಲ್ಲಾ ಮಟ್ಟದಲ್ಲಿ ಕಲಾಪಗಳ ಮೂಲಕ ಪ್ರಕರಣಗಳನ್ನು ತಗ್ಗಿಸಲು ತರಬೇತಿ ಮತ್ತು ಜಾಗೃತಿ ಕಾರ್ಯಕ್ರಮಗಳನ್ನು ಆಯೋಜಿಸುತ್ತಿದೆ.
ಮಾಹಿತಿ ಹಕ್ಕು: ಎರಡನೇ ಸ್ವಾತಂತ್ರ್ಯ
ಆಯುಕ್ತ ರಾಜಶೇಖರ್ ಅವರು, RTI ಕಾಯಿದೆಯನ್ನು ಎರಡನೇ ಸ್ವಾತಂತ್ರ್ಯ ಎಂದು ಕರೆದರೆ ತಪ್ಪಾಗಲಾರದು ಎಂದರು. ಕಾಯಿದೆ ಜಾರಿಗೆ ಬರುವ ಮೊದಲು, ಅಫಿಷಿಯಲ್ ಸೀಕ್ರೆಸಿ ಕಾಯಿದೆಯಿಂದಾಗಿ ಮಾಹಿತಿಯನ್ನು ಪಡೆಯಲು ಜನರಿಗೆ ತೊಂದರೆಯಾಗುತ್ತಿತ್ತು. RTI ಜಾರಿಯಾದ ಬಳಿಕ ಆಡಳಿತದಲ್ಲಿ ಪಾರದರ್ಶಕತೆ ಮತ್ತು ಶಿಸ್ತು ಹೆಚ್ಚಿದೆ. ಆದರೆ, ಕೆಲವರು ಕಾಯಿದೆಯನ್ನು ದುರ್ಬಳಕೆ ಮಾಡಿಕೊಳ್ಳುತ್ತಿದ್ದಾರೆ. ಮಾಹಿತಿ ಕೇಳುವುದು ಸಾರ್ವಜನಿಕ ಮತ್ತು ಸ್ವ-ಹಿತಾಸಕ್ತಿಗೆ ಸೀಮಿತವಾಗಿರಬೇಕೇ ಹೊರತು, ಅವ್ಯವಹಾರಕ್ಕೆ ಬಳಸಬಾರದು ಎಂದರು.
ದುರ್ಬಳಕೆಗೆ ಕಡಿವಾಣ, ದಂಡದ ವ್ಯವಸ್ಥೆ
ಕಾಯಿದೆಯ ದುರ್ಬಳಕೆ ತಡೆಗೆ ಆಯೋಗ ಕಠಿಣ ಕ್ರಮ ಕೈಗೊಳ್ಳಲಿದೆ. ಒಂದೇ ಮಾಹಿತಿಗಾಗಿ ಬಹು ಅರ್ಜಿಗಳನ್ನು ಸಲ್ಲಿಸುವವರನ್ನು ಕಪ್ಪುಪಟ್ಟಿಗೆ ಸೇರಿಸಲು ಚಿಂತನೆ ನಡೆದಿದ್ದು, ಈಗಾಗಲೇ 26 ಅರ್ಜಿದಾರರನ್ನು ನಿರ್ಬಂಧಿಸಲಾಗಿದೆ. ಮಾಹಿತಿ ನೀಡದ ಅಧಿಕಾರಿಗಳಿಗೆ ದಿನಕ್ಕೆ 250 ರೂ.ನಂತೆ ಗರಿಷ್ಠ 25,000 ರೂ. ದಂಡ, ಅರ್ಜಿದಾರರಿಗೆ 1 ಲಕ್ಷ ರೂ.ವರೆಗೆ ಪರಿಹಾರ, ಮತ್ತು ಶಿಸ್ತುಕ್ರಮಕ್ಕೆ ಶಿಫಾರಸು ಮಾಡುವ ಅಧಿಕಾರ ಆಯೋಗಕ್ಕಿದೆ.
ಜಿಲ್ಲಾಧಿಕಾರಿಗಳ ಗುರಿ
ಜಿಲ್ಲಾಧಿಕಾರಿ ಜಿ.ಎಂ.ಗಂಗಾಧರಸ್ವಾಮಿ, ದಾವಣಗೆರೆಯಲ್ಲಿ RTI ಅರ್ಜಿಗಳ ಸಂಖ್ಯೆಯನ್ನು ಕಡಿಮೆ ಮಾಡುವ ಗುರಿಯನ್ನು ಆಯೋಗ ಹೊಂದಿದೆ. ಎರಡನೇ ಮೇಲ್ಮನವಿ ಪ್ರಕರಣಗಳನ್ನು ಗಣನೀಯವಾಗಿ ತಗ್ಗಿಸಲು ಅಗತ್ಯ ಕ್ರಮ ಕೈಗೊಳ್ಳಲಾಗುವುದು ಎಂದರು.
ಇಲಾಖಾವಾರು ಬಾಕಿ ಪ್ರಕರಣಗಳು
ದಾವಣಗೆರೆ ಜಿಲ್ಲೆಯಲ್ಲಿ ಕಂದಾಯ ಇಲಾಖೆ (161), ಪಂಚಾಯತ್ ರಾಜ್ (90), ನಗರಾಭಿವೃದ್ಧಿ (75), ಜಲಸಂಪನ್ಮೂಲ (53), ಲೋಕೋಪಯೋಗಿ (35), ಶಿಕ್ಷಣ (31), ಸಮಾಜ ಕಲ್ಯಾಣ (30), ಗೃಹ ಇಲಾಖೆ (13), ಅಲ್ಪಸಂಖ್ಯಾತರ ಇಲಾಖೆ (11), ಅರಣ್ಯ (11), ಆರೋಗ್ಯ (10), ಇಂಧನ (9), ಸಹಕಾರ (8), ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ (7), ಕೈಗಾರಿಕೆ-ವಾಣಿಜ್ಯ (4), ಕೃಷಿ (2), ಸಾರಿಗೆ (2), ವಸತಿ (2) ಮತ್ತು ಇತರೆ (5) ಎರಡನೇ ಮೇಲ್ಮನವಿ ಅರ್ಜಿಗಳು ಬಾಕಿಯಿವೆ.
ಪತ್ರಿಕಾಗೋಷ್ಠಿಯಲ್ಲಿ ಜಿಲ್ಲಾ ಪಂಚಾಯತ್ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಗಿತ್ತೆ ಮಾಧವ ವಿಠ್ಠಲರಾವ್ ಉಪಸ್ಥಿತರಿದ್ದರು.
