ಬೆಂಗಳೂರು, ಜೂನ್ 2, 2025: ಖ್ಯಾತ ಚಿತ್ರ ನಿರ್ಮಾಪಕ ಸೂರಪ್ಪ ಬಾಬು ವಿರುದ್ಧ ಮಹಿಳೆಯೊಬ್ಬರು 92 ಲಕ್ಷ ರೂಪಾಯಿ ವಂಚನೆ ಆರೋಪದ ಮೇಲೆ ದೂರು ದಾಖಲಿಸಿದ್ದಾರೆ. ಈ ಬಗ್ಗೆ ಅಮೃತಹಳ್ಳಿ ಪೊಲೀಸ್ ಠಾಣೆಯಲ್ಲಿ FIR ದಾಖಲಾಗಿದ್ದು, ತನಿಖೆ ಆರಂಭವಾಗಿದೆ.
ದೂರುದಾರೆ ಲಕ್ಷ್ಮೀ ಅವರ ಹೇಳಿಕೆಯ ಪ್ರಕಾರ, 2023ರಲ್ಲಿ ತಮ್ಮ ಗಂಡನ ಮೂಲಕ ಸೂರಪ್ಪ ಬಾಬು ಅವರಿಗೆ ಪರಿಚಯವಾಗಿತ್ತು. ಸೂರಪ್ಪ ಬಾಬು, ತಾವು ಶಿವರಾಜ್ ಕುಮಾರ್ ಮತ್ತು ಗಣೇಶ್ ಜೊತೆ ಚಿತ್ರ ನಿರ್ಮಾಣ ಮಾಡುತ್ತಿರುವುದಾಗಿ ಹೇಳಿ, ಚಿತ್ರ ನಿರ್ಮಾಣಕ್ಕೆ ಸಾಲ ಕೇಳಿದ್ದರು. ಈ ನಂಬಿಕೆಯ ಮೇಲೆ ಲಕ್ಷ್ಮೀ ಅವರು ಹಂತಹಂತವಾಗಿ ಒಟ್ಟು 92.5 ಲಕ್ಷ ರೂಪಾಯಿಗಳನ್ನು ನೀಡಿದ್ದರು. ಇದರಲ್ಲಿ 2023ರ ನವೆಂಬರ್‌ನಲ್ಲಿ 25 ಲಕ್ಷ ರೂ. RTGS ಮೂಲಕ, ಮತ್ತೊಂದು 25 ಲಕ್ಷ ರೂ. ಆನ್‌ಲೈನ್ ಪಾವತಿ ಮೂಲಕ, ಮತ್ತು ಫೆಬ್ರವರಿಯಲ್ಲಿ 5 ಲಕ್ಷ ರೂ. ನಗದು ರೂಪದಲ್ಲಿ ಸೂರಪ್ಪ ಬಾಬುಗೆ ನೀಡಲಾಗಿತ್ತು.
ಆದರೆ, ಕೆಲ ದಿನಗಳ ನಂತರ ಸೂರಪ್ಪ ಬಾಬು ಸಂಪರ್ಕಕ್ಕೆ ಸಿಗದಂತೆ ಫೋನ್ ಸ್ವಿಚ್ ಆಫ್ ಮಾಡಿಕೊಂಡಿದ್ದರು. ವಿಚಾರಿಸಿದಾಗ, ಶಿವರಾಜ್ ಕುಮಾರ್ ಮತ್ತು ಗಣೇಶ್ ಜೊತೆ ಯಾವುದೇ ಚಿತ್ರ ನಿರ್ಮಾಣ ಮಾಡುತ್ತಿಲ್ಲ ಎಂಬ ಸತ್ಯ ಬೆಳಕಿಗೆ ಬಂದಿತು. ಇದಾದ ನಂತರ, ಲಕ್ಷ್ಮೀ ಅವರು ಹಣ ವಾಪಸ್ ಕೇಳಿದಾಗ, ಸೂರಪ್ಪ ಬಾಬು ಕೇವಲ 25 ಲಕ್ಷ ರೂ. ವಾಪಸ್ ನೀಡಿದ್ದರು. ಉಳಿದ 52.5 ಲಕ್ಷ ರೂ. ಕೇಳಿದಾಗ, ಬೆದರಿಕೆ ಒಡ್ಡಿದ್ದಾರೆ ಎಂದು ಆರೋಪಿಸಲಾಗಿದೆ.
“ನಾವು ಒಟ್ಟು 92.5 ಲಕ್ಷ ರೂ. ಕೊಟ್ಟಿದ್ದೇವೆ. ಆದರೆ, ಈಗಲೂ 52.5 ಲಕ್ಷ ರೂ. ಬಾಕಿ ಇದೆ. ಸೂರಪ್ಪ ಬಾಬು ಫೋನ್ ಸ್ವಿಚ್ ಆಫ್ ಮಾಡಿಕೊಂಡಿದ್ದಾರೆ, ಭೇಟಿಯಾಗುತ್ತಿಲ್ಲ. ವಾಯ್ಸ್ ಮೆಸೇಜ್ ಮತ್ತು ಟೆಕ್ಸ್ಟ್ ಮೆಸೇಜ್‌ಗಳಿಗೆ ಮಾತ್ರ ಸೀಮಿತವಾಗಿದ್ದಾರೆ,” ಎಂದು ಲಕ್ಷ್ಮೀ ತಮ್ಮ ದೂರಿನಲ್ಲಿ ತಿಳಿಸಿದ್ದಾರೆ.
ಈ ಘಟನೆಯಿಂದ ಬೇಸತ್ತ ಲಕ್ಷ್ಮೀ, ಸೂರಪ್ಪ ಬಾಬು ವಿರುದ್ಧ ಅಮೃತಹಳ್ಳಿ ಠಾಣೆಯಲ್ಲಿ ದೂರು ದಾಖಲಿಸಿದ್ದು, ಪೊಲೀಸರು FIR ದಾಖಲಿಸಿ ತನಿಖೆ ಆರಂಭಿಸಿದ್ದಾರೆ. “ನಾವು ಫಿಲಂ ಚೇಂಬರ್ಸ್‌ಗೂ ಈ ಬಗ್ಗೆ ದೂರು ಸಲ್ಲಿಸಲಿದ್ದೇವೆ,” ಎಂದು ಲಕ್ಷ್ಮೀ ಹೇಳಿದ್ದಾರೆ.
ಈ ಘಟನೆಯಿಂದ ಚಿತ್ರರಂಗದಲ್ಲಿ ವಂಚನೆ ಆರೋಪಗಳು ಮತ್ತೆ ಮುನ್ನೆಲೆಗೆ ಬಂದಿದ್ದು, ತನಿಖೆಯ ಫಲಿತಾಂಶಕ್ಕೆ ಕಾದುನೋಡಬೇಕಿದೆ.
