ಮುಂಬೈ: ಗೋವಾದಲ್ಲಿ ನಡೆಯಲಿರುವ 56ನೇ ಭಾರತದ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವ (ಐ ಎಫ್ ಎಫ್ ಐ) ದ ಚಾಲನಾ ಸಮಿತಿಯ ಮೊದಲ ಸಭೆ ಇಂದು ಮುಂಬೈನಲ್ಲಿರುವ ರಾಷ್ಟ್ರೀಯ ಚಲನಚಿತ್ರ ಅಭಿವೃದ್ಧಿ ನಿಗಮದ (ಎನ್ ಎಫ್ ಡಿ ಸಿ) ಪ್ರಧಾನ ಕಚೇರಿಯಲ್ಲಿ ಜರುಗಿತು. ಕೇಂದ್ರ ವಾರ್ತಾ ಮತ್ತು ಪ್ರಸಾರ ಸಚಿವ ಶ್ರೀ ಅಶ್ವಿನಿ ವೈಷ್ಣವ್ ಅವರ ಅಧ್ಯಕ್ಷತೆಯಲ್ಲಿ ನಡೆದ ಈ ಸಭೆಯಲ್ಲಿ ವಾರ್ತಾ ಮತ್ತು ಪ್ರಸಾರ ಸಚಿವಾಲಯದ ಕಾರ್ಯದರ್ಶಿ ಶ್ರೀ ಸಂಜಯ್ ಜಾಜು, ಉತ್ಸವದ ನಿರ್ದೇಶಕ ಶ್ರೀ ಶೇಖರ್ ಕಪೂರ್, ಎನ್ ಎಫ್ ಡಿ ಸಿ ವ್ಯವಸ್ಥಾಪಕ ನಿರ್ದೇಶಕ ಶ್ರೀ ಪ್ರಕಾಶ್ ಮಗ್ದುಮ್ ಸೇರಿದಂತೆ ಗೋವಾ ಸರ್ಕಾರ, ವಾರ್ತಾ ಮತ್ತು ಪ್ರಸಾರ ಸಚಿವಾಲಯ, ಎನ್ ಎಫ್ ಡಿ ಸಿ ಹಾಗೂ ಭಾರತೀಯ ಮತ್ತು ಜಾಗತಿಕ ಚಲನಚಿತ್ರೋದ್ಯಮದ ಚಾಲನಾ ಸಮಿತಿಯ ಸದಸ್ಯರು ಭಾಗವಹಿಸಿದ್ದರು.
ಸಭೆಯು 2025ರ ನವೆಂಬರ್ 20 ರಿಂದ 28 ರವರೆಗೆ ಗೋವಾದಲ್ಲಿ ನಡೆಯಲಿರುವ ಐ ಎಫ್ ಎಫ್ ಐ 2025 ರ ಕಾರ್ಯತಂತ್ರದ ಯೋಜನೆಯ ಮೇಲೆ ಕೇಂದ್ರೀಕರಿಸಿತು. ಕಾರ್ಯಕ್ರಮಗಳು, ಜನಸಂಪರ್ಕ, ಪ್ರತಿಭೆಗಳ ತೊಡಗಿಸಿಕೊಳ್ಳುವಿಕೆ, ಒಳಗೊಳ್ಳುವಿಕೆ, ಜಾಗತಿಕ ಸ್ಥಾನೀಕರಣ ಮತ್ತು ಸಾರ್ವಜನಿಕ ತೊಡಗಿಸಿಕೊಳ್ಳುವಿಕೆಯನ್ನು ಉತ್ತೇಜಿಸುವ ನವೀನ ಉಪಕ್ರಮಗಳ ಕುರಿತು ವಿವರವಾದ ಚರ್ಚೆಗಳು ನಡೆದವು. ಯುವಜನರಿಗೆ ಒತ್ತು ನೀಡುವ ಈ ಉತ್ಸವವು ವಿದ್ಯಾರ್ಥಿ ಚಲನಚಿತ್ರ ನಿರ್ಮಾಪಕರು ಮತ್ತು ಯುವ ಕಂಟೆಂಟ್ ರಚನೆಕಾರರಿಗೆ ಕ್ಯುರೇಟೆಡ್ ಮಾಸ್ಟರ್ ಕ್ಲಾಸ್, ಉದ್ಯಮ ಕಾರ್ಯಾಗಾರಗಳು ಮತ್ತು ಜಾಗತಿಕ ಮಾರ್ಗದರ್ಶಕರೊಂದಿಗೆ ಸಂಪರ್ಕಿಸುವ ನೆಟ್ವರ್ಕಿಂಗ್ ವೇದಿಕೆಗಳನ್ನು ಒದಗಿಸಲಿದೆ.

ಐ ಎಫ್ ಎಫ್ ಐ ಜೊತೆಗೆ, ದಕ್ಷಿಣ ಏಷ್ಯಾದ ಅತಿದೊಡ್ಡ ಚಲನಚಿತ್ರ ಮಾರುಕಟ್ಟೆಯಾದ ವೇವ್ಸ್ ಫಿಲ್ಮ್ ಬಜಾರ್ ಕೂಡ ನಡೆಯಲಿದೆ. ಭಾರತವನ್ನು ಕಂಟೆಂಟ್, ಸೃಜನಶೀಲತೆ ಮತ್ತು ಸಹ-ನಿರ್ಮಾಣಗಳಿಗೆ ಜಾಗತಿಕ ಕೇಂದ್ರವಾಗಿಸುವ ದೃಷ್ಟಿಕೋನದ ಭಾಗವಾಗಿ, ಫಿಲ್ಮ್ ಬಜಾರ್ ಅನ್ನು ವೇವ್ಸ್ ಫಿಲ್ಮ್ ಬಜಾರ್ ಆಗಿ ಮರು ಬ್ರ್ಯಾಂಡಿಂಗ್ ಮಾಡಲು ಚಾಲನಾ ಸಮಿತಿಯು ಅನುಮೋದನೆ ನೀಡಿದೆ.
ಉತ್ಸವದ ವಿನ್ಯಾಸದಲ್ಲಿ ಒಳಗೊಳ್ಳುವಿಕೆ ಮತ್ತು ಸೃಜನಶೀಲ ಒಳನೋಟಗಳನ್ನು ಉತ್ತೇಜಿಸಲು, ಚಾಲನಾ ಸಮಿತಿಯನ್ನು 16 ರಿಂದ 31 ಸದಸ್ಯರಿಗೆ ವಿಸ್ತರಿಸಲಾಗಿದೆ. ಇದರಲ್ಲಿ ಸಿನಿಮಾ, ನಿರ್ಮಾಣ, ಮಾಧ್ಯಮ ಮತ್ತು ಸಾಂಸ್ಕೃತಿಕ ಕ್ಷೇತ್ರಗಳ ಪರಿಣಿತರಾದ ಅನುಪಮ್ ಖೇರ್, ಗುಣೀತ್ ಮೋಂಗಾ ಕಪೂರ್, ಸುಹಾಸಿನಿ ಮಣಿರತ್ನಂ, ಖುಷ್ಬು ಸುಂದರ್, ಪಂಕಜ್ ಪರಾಶರ್ ಮತ್ತು ಪ್ರಸೂನ್ ಜೋಶಿ ಅವರಂತಹ ಪ್ರಮುಖರು ಸೇರಿದ್ದಾರೆ.

ಐ ಎಫ್ ಎಫ್ ಐ 2025 ರ ಗುರಿಯು ಸೃಜನಶೀಲ ಆರ್ಥಿಕತೆಯನ್ನು ಬಲಪಡಿಸುವುದು, ಮಾಧ್ಯಮ ಮತ್ತು ಮನರಂಜನಾ ವಲಯದಲ್ಲಿ ನವೋದ್ಯಮಗಳನ್ನು ಬೆಂಬಲಿಸುವುದು ಮತ್ತು ಏಕ-ಗವಾಕ್ಷಿ ಸೌಲಭ್ಯ ಹಾಗೂ ಪ್ರೋತ್ಸಾಹ ಆಧಾರಿತ ನೀತಿಗಳ ಮೂಲಕ ಭಾರತದಲ್ಲಿ ಚಿತ್ರೀಕರಣಕ್ಕೆ ಜಾಗತಿಕ ನಿರ್ಮಾಣಗಳನ್ನು ಆಕರ್ಷಿಸುವುದಾಗಿದೆ. ತನ್ನ ಮಹತ್ವಾಕಾಂಕ್ಷೆಯ ಕಾರ್ಯಕ್ರಮಗಳು ಮತ್ತು ಸಿನಿಮೀಯ ಶ್ರೇಷ್ಠತೆಗೆ ಬದ್ಧತೆಯೊಂದಿಗೆ, ಈ ಉತ್ಸವವು ಜಾಗತಿಕ ಸಿನೆಮಾದ ವಿಕಾಸವನ್ನು ಪ್ರತಿಬಿಂಬಿಸುವ ಮೈಲಿಗಲ್ಲಾಗಲಿದೆ.