ನವದೆಹಲಿ: ಪ್ರಧಾನಮಂತ್ರಿ ಕೃಷಿ ಸಿಂಚಾಯಿ ಯೋಜನೆ (ಪಿಎಂಕೆಎಸ್‌ವೈ) – ವೇಗವರ್ಧಿತ ನೀರಾವರಿ ಪ್ರಯೋಜನಗಳ ಕಾರ್ಯಕ್ರಮ (ಎಐಬಿಪಿ) ಅಡಿಯಲ್ಲಿ ಬಿಹಾರದ ಮಹತ್ವದ ಕೋಸಿ-ಮೆಚಿ ಇಂಟ್ರಾ-ಸ್ಟೇಟ್ ಲಿಂಕ್ ಯೋಜನೆಯನ್ನು ಸೇರಿಸಲು ಕೇಂದ್ರ ಸರ್ಕಾರದ ಆರ್ಥಿಕ ವ್ಯವಹಾರಗಳ ಸಂಪುಟ ಸಮಿತಿಯು (ಸಿಸಿಇಎ) ಇಂದು ಅನುಮೋದನೆ ನೀಡಿದೆ.
ಈ ಯೋಜನೆಯು ₹6,282.32 ಕೋಟಿ ವೆಚ್ಚದಲ್ಲಿ ರೂಪಿತವಾಗಿದ್ದು, ಇದರೊಳಗೆ ₹3,652.56 ಕೋಟಿ ಮೊತ್ತದ ಕೇಂದ್ರ ನೆರವು ನೀಡಲಾಗುತ್ತದೆ. ಮಾರ್ಚ್ 2029ರೊಳಗೆ ಯೋಜನೆ ಪೂರ್ಣಗೊಳ್ಳಲಿದೆ.
ಯೋಜನೆಯು ಕೋಸಿ ನದಿಯ ಹೆಚ್ಚುವರಿ ನೀರನ್ನು ಬಿಹಾರದ ಮಹಾನಂದಾ ಜಲಾನಯನ ಪ್ರದೇಶಕ್ಕೆ ತಿರುಗಿಸಲು ಉದ್ದೇಶಿತವಾಗಿದೆ. ಈ ಭಾಗದಲ್ಲಿ ಅಸ್ತಿತ್ವದಲ್ಲಿರುವ ಪೂರ್ವ ಕೋಸಿ ಮುಖ್ಯ ಕಾಲುವೆ (EKMC) ಯನ್ನು 41.30 ಕಿ.ಮೀ ವರೆಗೆ ಪುನರ್ ನಿರ್ಮಿಸಲಾಗುತ್ತಿದ್ದು, ನಂತರ 117.50 ಕಿ.ಮೀ ವರೆಗೆ ಮೆಚಿ ನದಿವರೆಗೆ ವಿಸ್ತರಿಸಲಾಗುತ್ತದೆ.
ಈ ಯೋಜನೆಯು ಬಿಹಾರದ ಅರಾರಿಯಾ, ಪೂರ್ಣಿಯಾ, ಕಿಶನಗಂಜ್ ಮತ್ತು ಕತಿಹಾರ್ ಜಿಲ್ಲೆಗಳ 2,10,516 ಹೆಕ್ಟೇರ್ ಪ್ರದೇಶಕ್ಕೆ ಖಾರಿಫ್ ಋತುವಿನಲ್ಲಿ ಹೆಚ್ಚುವರಿ ನೀರಾವರಿ ಸೌಲಭ್ಯವನ್ನು ಒದಗಿಸಲಿದೆ. ಅಲ್ಲದೇ, ಸುಮಾರು 2,050 ಮಿಲಿಯನ್ ಘನ ಮೀಟರ್ ಕೋಸಿ ನದಿಯ ನೀರನ್ನು ಮುಂಗಾರು ಅವಧಿಯಲ್ಲಿ ಮಹಾನಂದಾ ಪ್ರದೇಶಕ್ಕೆ ತಿರುಗಿಸುವ ವ್ಯವಸ್ಥೆ ರೂಪಿಸಲಾಗಿದೆ.
ಇದೇ ವೇಳೆ, ಈ ಯೋಜನೆಯಿಂದ ಅಸ್ತಿತ್ವದಲ್ಲಿರುವ EKMC ಕಾಲುವೆಯ 1.57 ಲಕ್ಷ ಹೆಕ್ಟೇರ್ ಪ್ರದೇಶಕ್ಕೆ ನೀರಿನ ಕೊರತೆಯ ಸಮಸ್ಯೆ ನಿವಾರಣೆಯಾಗಲಿದೆ.
ಪಿಎಂಕೆಎಸ್‌ವೈ ಹಿನ್ನೆಲೆ:
ಪ್ರಧಾನಮಂತ್ರಿ ಕೃಷಿ ಸಿಂಚಾಯಿ ಯೋಜನೆ 2015-16ರಲ್ಲಿ ಜಾರಿಗೆ ಬಂದು, ಕೃಷಿಭೂಮಿಗೆ ನೀರಿನ ನೇರ ಪ್ರವೇಶ, ನೀರಾವರಿ ವ್ಯಾಪ್ತಿಯ ವಿಸ್ತರಣೆ ಮತ್ತು ಸುಸ್ಥಿರ ಜಲಸಂಗ್ರಹಣದ ಗುರಿಗಳನ್ನು ಹೊಂದಿದೆ. ಪಿಎಂಕೆಎಸ್‌ವೈ 2.0 ಅಡಿಯಲ್ಲಿ ಈಗಾಗಲೇ 63 ಯೋಜನೆಗಳು ಯಶಸ್ವಿಯಾಗಿ ಪೂರ್ಣಗೊಂಡಿವೆ. ಕೋಸಿ-ಮೆಚಿ ಲಿಂಕ್ ಯೋಜನೆ ಈ ಪೈಕಿ ಹತ್ತನೇ ಯೋಜನೆಯಾಗಿದ್ದು, ಬಿಹಾರದ ಕೃಷಿಕರಿಗೆ ಜಲಸುರಕ್ಷಿತ ಭವಿಷ್ಯ ಒದಗಿಸುವ ನಿಟ್ಟಿನಲ್ಲಿ ಪ್ರಮುಖ ಹೆಜ್ಜೆಯಾಗಲಿದೆ.
