ಮಂಡ್ಯ: ಮೇಕೆದಾಟು ಯೋಜನೆ ತಡೆಗೆ ಕೇಂದ್ರ ಸರ್ಕಾರ ಹಾಗೂ ಕರ್ನಾಟಕದ ಸಂಸದರು ಸಾಕಷ್ಟು ಒತ್ತಡ ಹೇರದಿರುವುದಕ್ಕೆ ತೀವ್ರ ಆಕ್ರೋಶ ವ್ಯಕ್ತಪಡಿಸಿರುವ ಮಂಡ್ಯ ಜಿಲ್ಲೆಯ ಕಾಂಗ್ರೆಸ್ ಶಾಸಕ ಗಣಿಗ ಪಿ. ರವಿಕುಮಾರ್, “ಕನ್ನಡ ಹಾಗೂ ಕಾವೇರಿ ಇಬ್ಬರೂ ಒಂದೇ. ಕನ್ನಡ ಉಳಿಯೋದಕ್ಕೆ ಮಂಡ್ಯದ ಕೊಡುಗೆ ಸಾಕಷ್ಟಿದೆ. ಬೆಂಗಳೂರಲ್ಲಿ ಕನ್ನಡ ಉಳಿಸ್ತಿರೋರು ಮಂಡ್ಯದ ಮೂಲ ನಿವಾಸಿಗಳೇ” ಎಂದು ಗುಡುಗಿದ್ದಾರೆ.
ಸಾರ್ವಜನಿಕ ಸಭೆಯೊಂದರಲ್ಲಿ ಮಾತನಾಡಿದ ಅವರು, “ಸುಪ್ರೀಂ ಕೋರ್ಟ್ ತಮಿಳುನಾಡಿನ ಅರ್ಜಿಯನ್ನು ವಜಾಗೊಳಿಸಿದೆ. ಮೇಕೆದಾಟು ಯೋಜನೆ ಖಂಡಿತಾ ಆಗಬೇಕು. ನಮ್ಮ ರಾಜ್ಯ ಸರ್ಕಾರ ಸಂಪೂರ್ಣ ಸಿದ್ಧವಾಗಿದೆ. ಮೇಕೆದಾಟು ಪ್ರಾಧಿಕಾರ ರಚಿಸಿ, ಕಚೇರಿ ತೆರೆಯುವುದು, ಅಧಿಕಾರಿಗಳ ನಿಯೋಜನೆ – ಎಲ್ಲಕ್ಕೂ ಸಿದ್ಧತೆ ಮಾಡಿಕೊಂಡಿದ್ದೇವೆ. ಈಗ ಯೋಜನೆ ಸಿಡಬ್ಲ್ಯೂಆರ್ಸಿ ಮುಂದಿದೆ” ಎಂದು ಹೇಳಿದರು.
ಕೇಂದ್ರದಲ್ಲಿ ಅಧಿಕಾರದಲ್ಲಿರುವ ನಮ್ಮ ಸಂಸದರ ಕಾರ್ಯವೈಖರಿಯ ಬಗ್ಗೆ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ ಶಾಸಕ ರವಿಕುಮಾರ್, “ಎಂಪಿಗಳು ಮೋದಿಯವರ ಮುಂದೆ ಸ್ವೀಟ್ ತಿಂದು ಬಾಯಿ ಮುಚ್ಚಿಕೊಂಡು ಬರುತ್ತಾರಾ? ಅಮಿತ್ ಶಾ ಅವರ ಮುಂದೆ ಕೈ ಕಟ್ಟಿ ನಿಂತುಕೊಳ್ಳೋದೇನು ನಿಮ್ಮ ಕೆಲಸ? ಕುಮಾರಣ್ಣ (ಮುಖ್ಯಮಂತ್ರಿ ಸಿದ್ದರಾಮಯ್ಯ) ಕೇಂದ್ರ ಸರ್ಕಾರದ ಮೇಲೆ ಒತ್ತಡ ಹಾಕಬೇಕು. ತಮಿಳುನಾಡಿನ ಎಂಪಿಗಳು ವಾದ ಮಾಡಿದಂತೆ ನಮ್ಮ ಎಂಪಿಗಳು ವಾದ ಮಾಡಬೇಕು. ಮೇಕೆದಾಟು ಪರವಾಗಿ ಧ್ವನಿ ಎತ್ತಬೇಕು” ಎಂದು ಆಗ್ರಹಿಸಿದರು.
ಕನ್ನಡ ಸಂಘಟನೆಗಳಿಗೆ ಕರೆ ನೀಡಿದ ಅವರು, “ಕನ್ನಡ ಪರ ಸಂಘಟನೆಗಳು ಒಗ್ಗಟ್ಟಿನಿಂದ ಮನವಿ ಸಲ್ಲಿಸಿ, ಒತ್ತಡ ಹೇರಿ. ಎಂಪಿಗಳು ಬಂದಾಗ ಮನವಿ ಕೊಟ್ಟು ಜಾಗೃತಗೊಳಿಸಿ. ಮೇಕೆದಾಟು ಯೋಜನೆ ಕರ್ನಾಟಕದ ಬದುಕಿನ ಪ್ರಶ್ನೆ” ಎಂದು ಘೋಷಿಸಿದರು.
ಮೇಕೆದಾಟು ಯೋಜನೆಯನ್ನು ತಡೆಯುವ ತಮಿಳುನಾಡಿನ ಪ್ರಯತ್ನಗಳಿಗೆ ಕೇಂದ್ರ ಸರ್ಕಾರ ಸಾಥ್ ನೀಡುತ್ತಿರುವುದು ಕನ್ನಡಿಗರಲ್ಲಿ ಆಕ್ರೋಶ ಮೂಡಿಸಿದೆ ಎಂದು ರವಿಕುಮಾರ್ ಆರೋಪಿಸಿದ್ದು, ಈ ವಿಷಯ ರಾಜ್ಯದಾದ್ಯಂತ ಚರ್ಚೆಗೆ ಗ್ರಾಸವಾಗಿದೆ.
