ಬೆಂಗಳೂರು: ನಟ ದರ್ಶನ್ ಸೇರಿದಂತೆ ಐವರು ಆರೋಪಿಗಳನ್ನು ಬೇರೆ ಜೈಲಿಗೆ ವರ್ಗಾವಣೆ ಮಾಡಲು ಸಲ್ಲಿಸಲಾದ ಅರ್ಜಿಯ ವಿಚಾರಣೆ ಮಂಗಳವಾರ 64ನೇ ಸೆಷನ್ಸ್ ಕೋರ್ಟ್ನಲ್ಲಿ ನೆಡೆಯಿತು.
ದರ್ಶನ್, ನಾಗರಾಜ್ ಹಾಗೂ ಲಕ್ಷ್ಮಣ್ ಪರವಾಗಿ ವಾದ ಮಂಡಿಸಿದ ವಕೀಲ ಸುನಿಲ್ ಕುಮಾರ್ ಅವರು,
“ದರ್ಶನ್ ಸೆಲೆಬ್ರಿಟಿಯಾಗಿರುವ ಕಾರಣ ಪೊಲೀಸರು ಮತ್ತು ಜೈಲು ಅಧಿಕಾರಿಗಳು ಕಾನೂನನ್ನು ದುರುಪಯೋಗ ಮಾಡುತ್ತಿದ್ದಾರೆ. ಪ್ರಾಸಿಕ್ಯೂಷನ್ ನ್ಯಾಯಸಮ್ಮತವಾಗಿ ನಡೆದುಕೊಳ್ಳಬೇಕು, ಆದರೆ ಎಸ್ಪಿಪಿ ಅವರು ಶಿಕ್ಷೆ ಕೊಡಿಸುವತ್ತ ಹೆಚ್ಚು ಒತ್ತಡ ಹಾಕುತ್ತಿದ್ದಾರೆ” ಎಂದು ಆರೋಪಿಸಿದರು.
ವಕೀಲರ ವಾದಗಳು
- ಆರೋಪಿಗಳು ಪೊಲೀಸ್/ಜೈಲು ಅಧಿಕಾರಿಗಳ ಕಸ್ಟಡಿಯಲ್ಲಿ ಅಲ್ಲ, ಕೋರ್ಟ್ ಕಸ್ಟಡಿಯಲ್ಲಿ ಇದ್ದಾರೆ.
- ಪ್ರಿಸನರ್ಸ್ ಕಾಯಿದೆ 1963ರ ಪ್ರಕಾರ ನಾಲ್ಕು ವಿಧದ ಕೈದಿಗಳನ್ನು ಮಾತ್ರ ಶಿಫ್ಟ್ ಮಾಡಬಹುದು (ಮರಣದಂಡನೆ ಶಿಕ್ಷಿತರು, ಜೀವಾವಧಿ ಶಿಕ್ಷಿತರು, ದಂಡ ಪಾವತಿಸದವರು, ವರ್ತನೆ ಸರಿಯಿಲ್ಲದವರು). ದರ್ಶನ್ ಹಾಗೂ ಇತರರ ವಿರುದ್ಧ ವರ್ತನೆ ಕೆಟ್ಟಿದೆ ಎಂಬ ಆಧಾರವಿಲ್ಲ.
- ಆರೋಪಿಗಳು ಜೈಲಿಗೆ ಸೇರಿದ ಎರಡೇ ದಿನಗಳಲ್ಲಿ ಶಿಫ್ಟ್ ಕೋರಿ ಅರ್ಜಿ ಸಲ್ಲಿಸಿದ್ದು ಆಡಳಿತ ಮತ್ತು ಭದ್ರತಾ ಕಾರಣ ನೀಡಿ ವರ್ಗಾವಣೆ ಮಾಡುವುದಕ್ಕೆ ಅವಕಾಶವಿಲ್ಲ.
- 2024ರಲ್ಲಿ ಜೈಲು ರಾಜಾತಿಥ್ಯ ಪ್ರಕರಣದಲ್ಲಿ ಮಾತ್ರ ಶಿಫ್ಟ್ ಮಾಡಲಾಗಿತ್ತು. ಆ ವೇಳೆ ಜೈಲು ಅಧಿಕಾರಿಗಳ ಮೇಲೂ ಪ್ರಕರಣ ದಾಖಲಾಗಿತ್ತು.
- ಪರಪ್ಪನ ಅಗ್ರಹಾರದಲ್ಲಿ 2000ಕ್ಕಿಂತ ಹೆಚ್ಚು ಕೈದಿಗಳು ಇದ್ದರೂ ದರ್ಶನ್ ಮಾತ್ರ ಶಿಫ್ಟ್ ಆಗಬೇಕೆಂದು ಕೇಳುತ್ತಿರುವುದು ಅನುಮಾನಾಸ್ಪದ.
ಕನಿಷ್ಠ ಸೌಲಭ್ಯ ಕೋರಿಕೆ
ವಕೀಲರು, ದರ್ಶನ್ಗೆ ಜೈಲಿನಲ್ಲಿ ಅಗತ್ಯವಾದ ಬಟ್ಟೆ, ಹಾಸಿಗೆ, ಪ್ಲೇಟ್, ಚಪ್ಪಲಿ, ಸ್ಪೂನ್ ಮುಂತಾದ ಮೂಲಭೂತ ಸೌಲಭ್ಯಗಳನ್ನು ನೀಡಿಲ್ಲ ಎಂದು ಆರೋಪಿಸಿದರು.
“ಜೈಲು ಸೇರಿದ ಒಂದು ತಿಂಗಳು ಆದರೂ ಕುಟುಂಬಸ್ಥರಿಗೆ ಫೋನ್ ಮಾಡಲು, ವಿಡಿಯೋ ಕಾನ್ಫರೆನ್ಸ್ ಮೂಲಕ ಹಾಜರಾಗಲು ಅವಕಾಶ ನೀಡಿಲ್ಲ. ಟಿವಿ, ಪತ್ರಿಕೆಗಳೂ ಸಿಗುತ್ತಿಲ್ಲ. ಸುಪ್ರೀಂ ಕೋರ್ಟ್ ತೀರ್ಪಿನ ಪ್ರಕಾರ ಖೈದಿಗಳಿಗೆ ಮೂಲಭೂತ ಸೌಲಭ್ಯ ನೀಡುವುದು ಕಡ್ಡಾಯ” ಎಂದು ವಾದ ಮಂಡಿಸಿದರು.
ವಿಶೇಷ ಬೆಳವಣಿಗೆ
ವಿಚಾರಣೆಯ ವೇಳೆ, ಒಬ್ಬ ಅಪರಿಚಿತ ವ್ಯಕ್ತಿ ದರ್ಶನ್ ಸೇರಿ 17 ಮಂದಿಗೂ ಮರಣದಂಡನೆ ವಿಧಿಸಬೇಕೆಂದು ಅರ್ಜಿ ನೀಡಲು ಮುಂದಾದರು. ಆದರೆ ಜಡ್ಜ್ ಅವರು “ಯಾರ್ಯಾರೋ ಬಂದು ನೀಡುವ ಅರ್ಜಿ ಪಡೆಯಲು ಸಾಧ್ಯವಿಲ್ಲ” ಎಂದು ಸ್ಪಷ್ಟಪಡಿಸಿ ಅರ್ಜಿ ತಳ್ಳಿಹಾಕಿದರು.
ಮುಂದಿನ ಹಂತ
ದರ್ಶನ್ ಪರ ವಕೀಲರು, ಆರೋಪಿಗಳನ್ನು ಬೇರೆ ಜೈಲಿಗೆ ಶಿಫ್ಟ್ ಮಾಡಬಾರದು, ಜೊತೆಗೆ ಕನಿಷ್ಠ ಸೌಲಭ್ಯ ಒದಗಿಸಬೇಕೆಂದು ಕೋರ್ಟ್ಗೆ ಮನವಿ ಸಲ್ಲಿಸಿದ್ದಾರೆ.
ಈ ಅರ್ಜಿಯ ಕುರಿತು ಕೋರ್ಟ್ ಸೆಪ್ಟೆಂಬರ್ 9ರಂದು ಆದೇಶ ಕಾಯ್ದಿರಿಸಿದೆ.
