ಬೆಂಗಳೂರು: ಕನ್ನಡ ಚಿತ್ರರಂಗದ ಜನಪ್ರಿಯ ನಟ ದುನಿಯಾ ವಿಜಯ್ ಅವರು ತಮ್ಮ ಜೀವನದಲ್ಲಿ ಇತ್ತೀಚಿಗೆ ಸಂಭವಿಸಿರುವ ದೊಡ್ಡ ಬದಲಾವಣೆಯ ಬಗ್ಗೆ ಮುಕ್ತವಾಗಿ ಮಾತನಾಡಿದ್ದಾರೆ. ಸಾಹಿತ್ಯ, ಡಾ. ಬಿ.ಆರ್. ಅಂಬೇಡ್ಕರ್ ಅವರ ಕೃತಿಗಳು ಮತ್ತು ಭಾರತೀಯ ಸಂವಿಧಾನದ ಆಳವಾದ ಓದು ತಮ್ಮ ಬದುಕಿನ ನಡೆ, ಆಲೋಚನೆ ಮತ್ತು ದೃಷ್ಟಿಕೋನವನ್ನು ಸಂಪೂರ್ಣವಾಗಿ ಪರಿವರ್ತಿಸುತ್ತಿದೆ ಎಂದು ಅವರು ಹೇಳಿದ್ದಾರೆ.
ಇತ್ತೀಚಿನ ಸಂದರ್ಶನವೊಂದರಲ್ಲಿ ಮಾತನಾಡಿದ ದುನಿಯಾ ವಿಜಯ್, “ಈಗ ನಾನು ಸಾಹಿತ್ಯ, ಪುಸ್ತಕಗಳು, ಚರಿತ್ರೆ ಇವೆಲ್ಲವನ್ನೂ ಉತ್ಸಾಹದಿಂದ ಓದುತ್ತಿದ್ದೇನೆ. ಇದು ನನ್ನ ಜೀವನವನ್ನು ೩೬೦ ಡಿಗ್ರಿ ಬದಲಾಯಿಸಿದೆ ಎಂದೇ ಹೇಳಬೇಕು. ಓದುವಿಕೆಯಿಂದ ಹೆಚ್ಚಿನ ತಿಳುವಳಿಕೆ ಬಂದಿದೆ. ಅಂಬೇಡ್ಕರ್ ಅವರ ಬರಹಗಳು ಮತ್ತು ಸಂವಿಧಾನದ ಆಳವಾದ ಅಧ್ಯಯನ ನನ್ನ ಆಲೋಚನೆಯನ್ನು ಹೊಸ ದಿಕ್ಕಿಗೆ ತಿರುಗಿಸಿದೆ” ಎಂದು ವಿವರಿಸಿದರು.
ಅವರು ಮುಂದುವರೆದು, ಈ ಓದು ತಮ್ಮ ವೈಯಕ್ತಿಕ ಬೆಳವಣಿಗೆಗೆ ಮಹತ್ವದ್ದಾಗಿದೆ ಎಂದು ತಿಳಿಸಿದರು. ಹಿಂದೆ ಓದುವುದು ಕಡಿಮೆಯಿದ್ದರೂ, ಈಗ ಅದು ದೈನಂದಿನ ಜೀವನದ ಅವಿಭಾಜ್ಯ ಅಂಗವಾಗಿದೆ ಎಂದು ಹೇಳಿದರು.
