ಗ್ರಾಮೀಣ ಶಿಕ್ಷಣ ವ್ಯವಸ್ಥೆಯ ಸವಾಲುಗಳನ್ನು ಎತ್ತಿಹಿಡಿಯುವ ಕನ್ನಡ ಚಲನಚಿತ್ರ ‘ನಮ್ ಸಾಲಿ’ 17ನೇ ಬೆಂಗಳೂರು ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ (BIFFes) ಪ್ರದರ್ಶನಗೊಂಡು ಪ್ರೇಕ್ಷಕರ ಮನಸ್ಸು ಗೆದ್ದಿದೆ. ಏಷ್ಯನ್, ಭಾರತೀಯ ಹಾಗೂ ಕನ್ನಡ ಸ್ಪರ್ಧಾ ವಿಭಾಗಗಳಲ್ಲಿ ಆಯ್ಕೆಯಾಗಿದ್ದ ಈ ಚಿತ್ರಕ್ಕೆ ಪ್ರೇಕ್ಷಕರು ಭರ್ಪೂರ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ ಎಂದು ಚಿತ್ರತಂಡದವರು ಸಂತಸ ವ್ಯಕ್ತಪಡಿಸಿದ್ದಾರೆ.
ಅನೀಲ್ ರೆವೂರ್ ನಿರ್ದೇಶನದ ಈ ಚಿತ್ರವು ಕಲ್ಯಾಣ ಕರ್ನಾಟಕ ಭಾಗದ ಹಳ್ಳಿಗಳಲ್ಲಿನ ಶಾಲಾ ಶಿಕ್ಷಣದ ನೈಜ ಸ್ಥಿತಿಗತಿಯನ್ನು ಸೂಕ್ಷ್ಮವಾಗಿ ಬಿಂಬಿಸುತ್ತದೆ. ಗ್ರಾಮೀಣ ಪ್ರದೇಶಗಳ ಶಿಕ್ಷಣ ಬಿಕ್ಕಟ್ಟು, ಹಿಂದುಳಿದ ವರ್ಗದ ಮಕ್ಕಳ ಹಕ್ಕುಗಳು ಮತ್ತು ನಗರದ ವಿದ್ಯಾರ್ಥಿಗಳೊಂದಿಗಿನ ಸ್ಪರ್ಧೆಯ ಸವಾಲುಗಳನ್ನು ಚಿತ್ರದ ಮೂಲಕ ಎತ್ತಿಹಿಡಿಯಲಾಗಿದೆ.
ನಿರ್ದೇಶಕ ಅನೀಲ್ ರೆವೂರ್ ಮಾತನಾಡಿ, “ಗ್ರಾಮೀಣ ಶಿಕ್ಷಣದ ಬಿಕ್ಕಟ್ಟು ಮತ್ತು ಸವಾಲುಗಳನ್ನು ಈ ಚಿತ್ರ ಚಿತ್ರಿಸುತ್ತದೆ. ಹಳ್ಳಿಯ ಶಾಲೆಗಳ ಸ್ಥಿತಿ ಮತ್ತು ಶಿಕ್ಷಣ ವ್ಯವಸ್ಥೆಯ ನೈಜತೆಯನ್ನು ತೋರಿಸುವ ಪ್ರಯತ್ನ ಇದು. ಚಿತ್ರೋತ್ಸವದಲ್ಲಿ ಮನ್ನಣೆ ಸಿಗುವುದು ಬಹಳ ಖುಷಿ ತಂದಿದೆ” ಎಂದರು.
ಚಿತ್ರದ ಕಥೆಗಾರರು ಹಾಗೂ ನಿರ್ಮಾಪಕ ಶಂಕರ ಆರ್ ಘಂಟಿ ಹೇಳಿದರು, “ಹಳ್ಳಿಯ ಮಕ್ಕಳು ನಗರದ ಮಕ್ಕಳೊಂದಿಗೆ ಸ್ಪರ್ಧಿಸಬೇಕಾದ ಅಗತ್ಯವನ್ನು ಈ ಚಿತ್ರ ಒತ್ತಿಹೇಳುತ್ತದೆ. ಕಲ್ಯಾಣ ಕರ್ನಾಟಕದ ಹಿಂದುಳಿದ ಮಕ್ಕಳ ಶಿಕ್ಷಣ ಹಕ್ಕುಗಳ ಬಗ್ಗೆ ಸೂಕ್ಷ್ಮ ಚಿತ್ರಣ ನೀಡಲಾಗಿದೆ. ‘ನಮ್ ಸಾಲಿ’ ಎಂಬ ಕಾದಂಬರಿಯನ್ನು ಆಧರಿಸಿ ಇದನ್ನು ಸಿನಿಮಾ ರೂಪಕ್ಕೆ ತರಲಾಗಿದೆ.”
ಇದು ಮಕ್ಕಳ ಕಥಾವಸ್ತುವಿನ ಚಿತ್ರವಾಗಿದ್ದು, ಜೀವನ್, ವಿನಯ್ ಕುಮಾರ್ ಮತ್ತು ಶ್ರೀಶೈಲ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಜಹಾಂಗೀರ್, ಹನುಮಕ್ಕ ಹಾಗೂ ಮಹದೇವ್ ಹಡಪದ್ ಸಹ ಪ್ರಮುಖ ಪಾತ್ರಗಳಲ್ಲಿದ್ದಾರೆ. ಕರಣ್ ಪ್ರಸಾದ್ ಹಾಗೂ ಅರುಣ್ ಛಾಯಾಗ್ರಹಣ ನಿರ್ವಹಿಸಿದ್ದು, ಮುನ್ನ ಸಂಗೀತ ನೀಡಿದ್ದಾರೆ.
ಜನವರಿ 29ರಿಂದ ಫೆಬ್ರವರಿ 6ರವರೆಗೆ ನಡೆದ ಈ ಚಿತ್ರೋತ್ಸವದಲ್ಲಿ ‘ನಮ್ ಸಾಲಿ’ ಪ್ರದರ್ಶನಗೊಂಡು ಕನ್ನಡ ಸಿನಿಮಾ ಪ್ರೇಮಿಗಳ ಮೆಚ್ಚುಗೆಗೆ ಪಾತ್ರವಾಗಿದೆ. ಗ್ರಾಮೀಣ ಶಿಕ್ಷಣದ ಮಹತ್ವವನ್ನು ಎತ್ತಿಹಿಡಿಯುವ ಇಂತಹ ಚಿತ್ರಗಳು ಸಮಾಜದಲ್ಲಿ ಚರ್ಚೆಯನ್ನು ಹುಟ್ಟುಹಾಕುವ ಅಗತ್ಯವನ್ನು ತೋರಿಸಿವೆ.
