ಹೊಸದಿಲ್ಲಿ: ಕೇಂದ್ರ ಹಣಕಾಸು ಮತ್ತು ಕಾರ್ಪೊರೇಟ್ ವ್ಯವಹಾರಗಳ ಸಚಿವೆ ಶ್ರೀಮತಿ ನಿರ್ಮಲಾ ಸೀತಾರಾಮನ್ ಅವರು ಸೆಪ್ಟೆಂಬರ್ 27ರಿಂದ 29ರವರೆಗೆ ಖತಾರ್ಗೆ ಅಧಿಕೃತ ಭೇಟಿ ನೀಡಲಿದ್ದಾರೆ. ಹಣಕಾಸು ಸಚಿವಾಲಯದ ಅಧಿಕಾರಿಗಳನ್ನು ಒಳಗೊಂಡ ನಿಯೋಗಕ್ಕೆ ಅವರು ನಾಯಕತ್ವ ವಹಿಸಲಿದ್ದಾರೆ.
ಈ ಭೇಟಿಯ ಅವಧಿಯಲ್ಲಿ ಸಚಿವೆ ಸೆಪ್ಟೆಂಬರ್ 28ರಂದು ದೋಹಾದಲ್ಲಿ ನಡೆಯಲಿರುವ ಏಷ್ಯನ್ ಇನ್ಫ್ರಾಸ್ಟ್ರಕ್ಚರ್ ಇನ್ವೆಸ್ಟ್ಮೆಂಟ್ ಬ್ಯಾಂಕ್ (ಎಐಐಬಿ)ನ ಬೋರ್ಡ್ ಆಫ್ ಗವರ್ನರ್ಗಳ 11ನೇ ವಾರ್ಷಿಕ ಸಭೆಯಲ್ಲಿ ಭಾಗವಹಿಸಲಿದ್ದಾರೆ. ಜೊತೆಗೆ ಎಐಐಬಿ ಅಧ್ಯಕ್ಷರು ಹಾಗೂ ಜೋರ್ಡಾನ್, ಸ್ವಿಟ್ಜರ್ಲೆಂಡ್, ಅಲ್ಜೀರಿಯಾ, ಸೌದಿ ಅರೇಬಿಯಾ ಮತ್ತು ನೇಪಾಳದ ಸಹವರ್ತಿ ಸಚಿವರೊಂದಿಗೆ ಪ್ರಮುಖ ದ್ವಿಪಕ್ಷೀಯ ಸಭೆಗಳನ್ನು ನಡೆಸಲಿದ್ದಾರೆ.
ಎಐಐಬಿ ವಾರ್ಷಿಕ ಸಭೆಯಲ್ಲಿ ಭಾರತದ ಗವರ್ನರ್ ಆಗಿ ಸಚಿವೆ ಭಾಗವಹಿಸಲಿದ್ದಾರೆ. ಎಐಐಬಿಯಲ್ಲಿ ಭಾರತವು ಎರಡನೇ ಅತಿ ದೊಡ್ಡ ಷೇರುದಾರ ರಾಷ್ಟ್ರವಾಗಿದೆ.
ಅಧಿಕೃತ ಭೇಟಿಯ ಭಾಗವಾಗಿ ಸಚಿವೆ ಖತಾರ್ ಸರ್ಕಾರದ ನಾಯಕತ್ವವನ್ನು ಭೇಟಿಯಾಗುವ ನಿರೀಕ್ಷೆಯಿದ್ದು, ಖತಾರ್ನ ವ್ಯಾಪಾರ ನಾಯಕರು ಮತ್ತು ಹೂಡಿಕೆದಾರರೊಂದಿಗೆ ಸಂವಾದ ನಡೆಸಲಿದ್ದಾರೆ.
