ಬೆಂಗಳೂರು: ಕರ್ನಾಟಕ ರಾಜ್ಯ ಸರ್ಕಾರದ ಎಲೆಕ್ಟ್ರಾನಿಕ್ಸ್, ಐಟಿ/ಬಿಟಿ ಇಲಾಖೆ ಮತ್ತು ಸಾಫ್ಟ್ವೇರ್ ಟೆಕ್ನಾಲಜಿ ಪಾರ್ಕ್ಸ್ ಆಫ್ ಇಂಡಿಯಾ (ಎಸ್ಟಿಪಿಐ) ಸಂಯುಕ್ತ ಆಶ್ರಯದಲ್ಲಿ ಆಯೋಜಿತವಾಗಿರುವ 28ನೇ ಆವೃತ್ತಿಯ ಬೆಂಗಳೂರು ತಂತ್ರಜ್ಞಾನ ಶೃಂಗಸಭೆ (ಬಿಟಿಎಸ್ 2025) ನವೆಂಬರ್ 18 ರಿಂದ 20ರವರೆಗೆ ತುಮಕೂರು ರಸ್ತೆಯ ಬೆಂಗಳೂರು ಅಂತರರಾಷ್ಟ್ರೀಯ ಪ್ರದರ್ಶನ ಕೇಂದ್ರದಲ್ಲಿ (ಬಿಐಇಸಿ) ನಡೆಯಲಿದೆ. “ಫ್ಯೂಚರೈಸ್ – ತಂತ್ರಜ್ಞಾನ ಮತ್ತು ನಾವೀನ್ಯತೆಯ ಮೂಲಕ ಭವಿಷ್ಯ ರೂಪಿಸಿ” ಎಂಬ ಥೀಮ್ನೊಂದಿಗೆ ನಡೆಯುತ್ತಿರುವ ಈ ಶೃಂಗಸಭೆಯು ಏಷ್ಯಾದ ಅತಿದೊಡ್ಡ ಮತ್ತು ಅತ್ಯಂತ ಭವಿಷ್ಯಮುಖಿ ತಾಂತ್ರಿಕ ಕಾರ್ಯಕ್ರಮವಾಗಿ ಮರುಕಲ್ಪನೆಗೊಂಡಿದೆ.
ಮುಖ್ಯಮಂತ್ರಿ ಶ್ರೀ ಸಿದ್ದರಾಮಯ್ಯ ಅವರು ನಾಳೆ (ನವೆಂಬರ್ 18) ಉಪಮುಖ್ಯಮಂತ್ರಿ ಶ್ರೀ ಡಿ.ಕೆ. ಶಿವಕುಮಾರ್ ಸಮ್ಮುಖದಲ್ಲಿ ಶೃಂಗಸಭೆಯನ್ನು ಉದ್ಘಾಟಿಸಲಿದ್ದಾರೆ. ಉದ್ಘಾಟನಾ ಸಮಾರಂಭದಲ್ಲಿ ಬೃಹತ್ ಮತ್ತು ಮಧ್ಯಮ ಕೈಗಾರಿಕೆಗಳ ಸಚಿವ ಶ್ರೀ ಎಂ.ಬಿ. ಪಾಟೀಲ್, ಜರ್ಮನಿಯ ಬವೇರಿಯಾ ಸಂಸತ್ ಅಧ್ಯಕ್ಷೆ ಇಲ್ಸೆ ಐಗ್ನರ್, ನಾರ್ವೆ ಆರೋಗ್ಯ ಸಚಿವ ಜಾನ್ ಕ್ರಿಶ್ಚಿಯನ್ ವೆಸ್ಟ್ರೆ, ಆಸ್ಟ್ರೇಲಿಯಾದ ಮೆಲ್ಬರ್ನ್ ಮೇಯರ್ ನಿಕೋಲಸ್ ರೀಸ್, ಪೋಲೆಂಡ್ ಡಿಜಿಟಲೀಕರಣ ಉಪ ಸಚಿವ ರಫಲ್ ರೋಸಿನ್ಸ್ಕಿ ಮತ್ತು ಎಸ್ಟಿಪಿಐ ಮಹಾನಿರ್ದೇಶಕ ಶ್ರೀ ಅರವಿಂದ್ ಕುಮಾರ್ ಭಾಗವಹಿಸಲಿದ್ದಾರೆ.
ದಾಖಲೆಯ ಸಂಖ್ಯೆಯ ಭಾಗವಹಿಸುವವರು
- 60ಕ್ಕೂ ಹೆಚ್ಚು ದೇಶಗಳಿಂದ 50,000ಕ್ಕೂ ಹೆಚ್ಚು ವಾಣಿಜ್ಯ ಸಂದರ್ಶಕರು
- 1,000ಕ್ಕೂ ಹೆಚ್ಚು ಪ್ರದರ್ಶಕರು
- 500ಕ್ಕೂ ಹೆಚ್ಚು ಜಾಗತಿಕ ಭಾಷಣಕಾರರು
- 100ಕ್ಕೂ ಹೆಚ್ಚು ಸಭೆಗಳು ಮತ್ತು 10 ಪ್ರಮುಖ ಸಮ್ಮೇಳನಗಳು
- 15,000ಕ್ಕೂ ಹೆಚ್ಚು ಭಾಗವಹಿಸುವವರು
ಈ ಬಾರಿ ಬೆಂಗಳೂರು ಅರಮನೆಯಿಂದ ಬಿಐಇಸಿಗೆ ಸ್ಥಳಾಂತರಗೊಂಡಿರುವುದು ಶೃಂಗಸಭೆಯ ಬೃಹತ್ ಬೆಳವಣಿಗೆಯ ಸಂಕೇತವಾಗಿದೆ.
ಪ್ರಮುಖ ಆಕರ್ಷಣೆಗಳು
- ಕೃತಕ ಬುದ್ಧಿಮತ್ತೆ (AI), ಕ್ವಾಂಟಂ ಕಂಪ್ಯೂಟಿಂಗ್, ಜೈವಿಕ ತಂತ್ರಜ್ಞಾನ, ಎಲೆಕ್ಟ್ರಾನಿಕ್ ಸೆಮಿಕಂಡಕ್ಟರ್, ಆರೋಗ್ಯ ತಂತ್ರಜ್ಞಾನ, ಪರಿಸರ ಸ್ನೇಹಿ ತಂತ್ರಜ್ಞಾನ, ಬಾಹ್ಯಾಕಾಶ ತಂತ್ರಜ್ಞಾನ ಸೇರಿದಂತೆ ಡೀಪ್ಟೆಕ್ ಕ್ಷೇತ್ರಗಳಿಗೆ ವಿಶೇಷ ಒತ್ತು
- ಮೂರು ಹೊಸ ನೀತಿಗಳ ಘೋಷಣೆ: ಕರ್ನಾಟಕ ಐಟಿ ನೀತಿ, ಸ್ಟಾರ್ಟಪ್ ನೀತಿ ಮತ್ತು ಬಾಹ್ಯಾಕಾಶ ತಂತ್ರಜ್ಞಾನ ನೀತಿ
- ಭವಿಷ್ಯ ರೂಪಿಸುವವರ ಸಮಾವೇಶ (Future Makers Conclave) – ಗಗನಯಾತ್ರಿ ಗ್ರೂಪ್ ಕ್ಯಾಪ್ಟನ್ ಶುಭಾಂಶು ಶುಕ್ಲಾ, ಟೆನಿಸ್ ತಾರೆ ಸಾನಿಯಾ ಮಿರ್ಜಾ, ಕ್ರಿಕೆಟ್ ಆಟಗಾರ್ತಿ ರಿಚಾ ಘೋಷ್, ಲೇಖಕ ಅಂಕುರ್ ವಾರಿಕೂ, ಜೆಪ್ಟೋ ಸಹ-ಸಂಸ್ಥಾಪಕಿ ಕೈವಲ್ಯ ವೋಹ್ರಾ ಸೇರಿದಂತೆ ಸ್ಫೂರ್ತಿದಾಯಕ ವ್ಯಕ್ತಿಗಳ ಉಪಸ್ಥಿತಿ
ಜಾಗತಿಕ ಸಹಭಾಗಿತ್ವ
- ಪಾಲುದಾರ ದೇಶ: ಆಸ್ಟ್ರೇಲಿಯಾ
- ಕಂಟ್ರಿ ಫೋಕಸ್ ಪಾಲುದಾರರು: ಜರ್ಮನಿಯ ಎನ್ಆರ್ಡಬ್ಲ್ಯೂ ಗ್ಲೋಬಲ್ ಬಿಸಿನೆಸ್, ನಾರ್ವೆ
- ಕಂಚಿನ ಪಾಲುದಾರ: ಪೋಲೆಂಡ್
- ಇಟಲಿ, ಅಮೆರಿಕಾ, ಜಪಾನ್, ದಕ್ಷಿಣ ಕೊರಿಯಾ, ಸಿಂಗಪುರ ಸೇರಿ 60ಕ್ಕೂ ಹೆಚ್ಚು ದೇಶಗಳ ಪ್ರಾತಿನಿಧ್ಯ
ಸಚಿವ ಪ್ರಿಯಾಂಕ ಖರ್ಗೆ ಹೇಳಿಕೆ
ಪೂರ್ವಭಾವಿ ಸುದ್ದಿಗೋಷ್ಠಿಯಲ್ಲಿ ಐಟಿ/ಬಿಟಿ ಸಚಿವ ಶ್ರೀ ಪ್ರಿಯಾಂಕ ಖರ್ಗೆ ಅವರು, “ಬೆಂಗಳೂರು ಟೆಕ್ ಶೃಂಗಸಭೆಯು ಐಟಿ-ಬಿಟಿಯಿಂದ ಹಿಡಿದು ಡೀಪ್ಟೆಕ್, ಬಾಹ್ಯಾಕಾಶ ಮತ್ತು ಸುಸ್ಥಿರತೆಯವರೆಗೆ ವಿಸ್ತರಿಸಿ ಜಾಗತಿಕ ನಾವೀನ್ಯತೆಯ ಪ್ರಮುಖ ವೇದಿಕೆಯಾಗಿ ಬೆಳೆದಿದೆ. ಈ ಬಾರಿ ಭವಿಷ್ಯ ರೂಪಿಸುವವರ ಸಮಾವೇಶವು 10,000ಕ್ಕೂ ಹೆಚ್ಚು ಉದ್ಯಮಶೀಲರಿಗೆ ಬಂಡವಾಳ, ಮಾರ್ಗದರ್ಶನ ಮತ್ತು ಜಾಗತಿಕ ಜಾಲ ಸಂಪರ್ಕ ಒದಗಿಸಲಿದೆ” ಎಂದು ತಿಳಿಸಿದರು.
ಉದ್ಘಾಟನಾ ಪೂರ್ಣಾವಧಿ ಸಭೆ
“ಭಾರತದ ಭವಿಷ್ಯ: ಆಮೂಲಾಗ್ರ ಮತ್ತು ಸುಸ್ಥಿರ ಪರಿವರ್ತನೆ” ಎಂಬ ವಿಷಯದಡಿ ಇನ್ಫೊಸಿಸ್ ಸಹ-ಸಂಸ್ಥಾಪಕ ಶ್ರೀ ಕ್ರಿಸ್ ಗೋಪಾಲಕೃಷ್ಣನ್, ಬಯೋಕಾನ್ ಅಧ್ಯಕ್ಷೆ ಡಾ. ಕಿರಣ್ ಮಜುಂದಾರ್ ಶಾ, ಆ್ಯಕ್ಸೆಲ್ ಇಂಡಿಯಾ ಸಂಸ್ಥಾಪಕ ಪ್ರಶಾಂತ್ ಪ್ರಕಾಶ್ ಸೇರಿದಂತೆ ಪ್ರಮುಖರು ಚರ್ಚೆ ನಡೆಸಲಿದ್ದಾರೆ.
ಇನ್ನೂ ಇಸ್ರೊ ಅಧ್ಯಕ್ಷ ಡಾ. ವಿ. ನಾರಾಯಣನ್, ಸ್ಯಾಪ್ ಲ್ಯಾಬ್ಸ್ ಇಂಡಿಯಾ ಎಂಡಿ ಸಿಂಧು ಗಂಗಾಧರನ್, ಕಿಂಡ್ರಿಲ್ ಇಂಡಿಯಾ ಸಿಇಒ ಲಿಂಗರಾಜು ಸಾವ್ಕಾರ್ ಸೇರಿದಂತೆ ತಂತ್ರಜ್ಞಾನ ದಿಗ್ಗಜರು ಭಾಷಣ ಮಾಡಲಿದ್ದಾರೆ.
ನವೆಂಬರ್ 20ರಂದು ವೊಕ್ಟ್ರೊನಿಕಾ-ಸುಹಾನಿ ಶಾ ಅವರ ಸಂಗೀತ-ಮಾಂತ್ರಿಕ ಪ್ರದರ್ಶನ, ಗಗನಯಾತ್ರಿ ಶುಭಾಂಶು ಶುಕ್ಲಾ ಅವರ ಸ್ಫೂರ್ತಿದಾಯಕ ಭಾಷಣ, ಕರ್ನಾಟಕ ಯುನಿಕಾರ್ನ್ ಸಂಸ್ಥಾಪಕರ ಸನ್ಮಾನ ಮತ್ತು ಡೀಪ್ಟೆಕ್ ಹೂಡಿಕೆ ಘೋಷಣೆಗಳೊಂದಿಗೆ ಶೃಂಗಸಭೆ ಮುಕ್ತಾಯಗೊಳ್ಳಲಿದೆ.
ವಿವರಗಳಿಗೆ: www.bengalurutechsummit.com
