ಬೆಂಗಳೂರು: ಗ್ಲೋಬಲ್ ಚೆಸ್ ಲೀಗ್ (ಜಿಸಿಎಲ್) ನಾಲ್ಕನೇ ದಿನದ ಪಂದ್ಯಗಳು ರೋಚಕ ತಿರುವುಗಳಿಗೆ ಸಾಕ್ಷಿಯಾದವು. ಟ್ರಿವೇಣಿ ಕಾಂಟಿನೆಂಟಲ್ ಕಿಂಗ್ಸ್ ತಂಡವು ಟೇಬಲ್ ಟಾಪರ್ಗಳಾಗಿದ್ದ ಆಲ್ಪೈನ್ ಎಪಿಎಲ್ ಪೈಪರ್ಸ್ ತಂಡವನ್ನು 10-4 ಅಂತರದಿಂದ ಮಣಿಸುವ ಮೂಲಕ ಅಗ್ರ ಎರಡು ಸ್ಥಾನಗಳ ಪೈಪೋಟಿಯನ್ನು ಮತ್ತಷ್ಟು ರೋಚಕಗೊಳಿಸಿತು. ಮತ್ತೊಂದೆಡೆ, ಗಂಗಾ ಗ್ರ್ಯಾಂಡ್ಮಾಸ್ಟರ್ಸ್ ತಂಡವು ಪಿಬಿಜಿ ಅಲಾಸ್ಕನ್ ನೈಟ್ಸ್ ವಿರುದ್ಧ 12-8 ಅಂತರದ ನಾಟಕೀಯ ಗೆಲುವು ದಾಖಲಿಸಿತು.
ವಿಶೇಷವೆಂದರೆ, ಗಂಗಾ ಗ್ರ್ಯಾಂಡ್ಮಾಸ್ಟರ್ಸ್–ಪಿಬಿಜಿ ಅಲಾಸ್ಕನ್ ನೈಟ್ಸ್ ನಡುವಿನ ಪಂದ್ಯದಲ್ಲಿ ಎಲ್ಲಾ ಆರು ಬೋರ್ಡ್ಗಳಲ್ಲೂ ಫಲಿತಾಂಶ ಬಂದಿದ್ದು, ಜಿಸಿಎಲ್ ಇತಿಹಾಸದಲ್ಲೇ ಮೊದಲ ಬಾರಿಗೆ ಇಂತಹ ಘಟನೆ ನಡೆದಿದೆ.
ಕೊನೆಯ ಕ್ಷಣದಲ್ಲಿ ಬದಲಾದ ಪಂದ್ಯದ ಚಿತ್ರಣ
ಗಂಗಾ ಗ್ರ್ಯಾಂಡ್ಮಾಸ್ಟರ್ಸ್ 9-8ರಿಂದ ಮುನ್ನಡೆಯಲ್ಲಿದ್ದಾಗ, ಪ್ರೋಡಿಜಿ ಬೋರ್ಡ್ನಲ್ಲಿ ಪಿಬಿಜಿ ಅಲಾಸ್ಕನ್ ನೈಟ್ಸ್ ಪರ ಜಿಸಿಎಲ್ಗೆ ಪದಾರ್ಪಣೆ ಮಾಡಿದ್ದ ಅಭಿಮನ್ಯು ಮಿಶ್ರಾ ಗೆಲುವಿನ ಸ್ಪಷ್ಟ ಅವಕಾಶದಲ್ಲಿದ್ದರು. ಲಿಯೋನ್ ಲ್ಯೂಕ್ ಮೆಂಡೊನ್ಸಾ ವಿರುದ್ಧದ ಪಂದ್ಯದಲ್ಲಿ ಮಿಶ್ರಾ ಪಾನ್ ಅನ್ನು ಕ್ವೀನ್ಗೆ ಪ್ರಮೋಟ್ ಮಾಡುವ ಹಂತದಲ್ಲಿದ್ದರು.
ಆದರೆ ಪ್ರಮೋಶನ್ ವೇಳೆ ಗಡಿಯಾರ ಒತ್ತುವ ಮೊದಲು ಕಾಯಿಗಳನ್ನು ಸರಿಯಾಗಿ ಇರಿಸದೇ, ಕೇವಲ ಒಂದು ಸೆಕೆಂಡ್ ಉಳಿದಿದ್ದಾಗ ಕ್ಲಾಕ್ ಒತ್ತಿದರು. ಮೆಂಡೊನ್ಸಾ ತಕ್ಷಣವೇ ಆರ್ಬಿಟ್ರೇಟರ್ಗೆ ವಿಷಯ ತಿಳಿಸಿದರು. ಪರಿಣಾಮವಾಗಿ ಮಿಶ್ರಾ ಸಮಯ ಮೀರಿದ ಕಾರಣ ಸೋಲನುಭವಿಸಿದರು. ಈ ಅನಿರೀಕ್ಷಿತ ಬೆಳವಣಿಗೆಯೇ ಗಂಗಾ ಗ್ರ್ಯಾಂಡ್ಮಾಸ್ಟರ್ಸ್ ಗೆಲುವನ್ನು ಖಚಿತಪಡಿಸಿತು.
ಪಂದ್ಯ ಬಳಿಕ ಮೆಂಡೊನ್ಸಾ, ಮಿಶ್ರಾ ಗೆಲುವಿನ ಸ್ಥಿತಿಯಲ್ಲಿದ್ದರು ಎಂದು ಒಪ್ಪಿಕೊಂಡರು. “ಅವರು ಸ್ಪಷ್ಟವಾಗಿ ಗೆಲ್ಲುತ್ತಿದ್ದರು. ನನಗೆ ದೊರೆತ ಏಕೈಕ ಅವಕಾಶವನ್ನು ಬಳಸಿಕೊಂಡೆ,” ಎಂದು ಅವರು ಹೇಳಿದರು.
ಮಿಶ್ರಾ ಕೂಡ ಘಟನೆಯ ಬಗ್ಗೆ ಬೇಸರ ವ್ಯಕ್ತಪಡಿಸಿ, “ನಾನು ಗೆದ್ದಿದ್ದರೆ ನನ್ನ ತಂಡವೇ ಪಂದ್ಯ ಗೆಲ್ಲುತ್ತಿತ್ತು. ಇದು ನಿಜಕ್ಕೂ ನೋವುಂಟುಮಾಡುತ್ತದೆ,” ಎಂದರು.
ಆನಂದ್ ವಿರುದ್ಧ ನೆಪೊಮ್ನಿಯಾಚ್ಚಿಯ ಅದ್ಭುತ ಗೆಲುವು
ಐಕಾನ್ ಬೋರ್ಡ್ನಲ್ಲಿ ಇಯಾನ್ ನೆಪೊಮ್ನಿಯಾಚ್ಚಿ ಕೇವಲ 23 ನಡೆಗಳಲ್ಲಿ ವಿಶ್ವನಾಥನ್ ಆನಂದ್ ಅವರನ್ನು ಮಣಿಸಿದರು. ಪೊಲಿನಾ ಶುವಲೋವಾ, ಕ್ಯಾಟೆರಿನಾ ಲಾಗ್ನೊ ವಿರುದ್ಧ ನಾಲ್ಕು ಪಂದ್ಯಗಳಲ್ಲಿ ಮೂರನೇ ಗೆಲುವು ದಾಖಲಿಸಿದರು.
ಪ್ಲೇಯರ್ ಆಫ್ ದಿ ಮ್ಯಾಚ್ ಲಿಯೆನರ್ ಡೊಮಿಂಗೆಜ್ ಪೆರೆಜ್, 15 ವರ್ಷದ ಯಾಗಿಜ್ ಕಾನ್ ಎರ್ಡೊಗ್ಮಸ್ ಅವರನ್ನು ಸಮಯದ ಒತ್ತಡದಲ್ಲಿ ಸೋಲಿಸಿದರು. ಮತ್ತೊಂದೆಡೆ, ಅರ್ಜುನ್ ಎರಿಗೈಸಿ ಅವರು ಲೆವಾನ್ ಅರೋನಿಯನ್ ಅವರನ್ನು ಹಾಗೂ ನಿನೋ ಬ್ಯಾಟ್ಸಿಯಾಶ್ವಿಲಿ ಅವರು ಸ್ಟಾವ್ರೂಲಾ ತ್ಸೊಲಕಿದು ಅವರನ್ನು ಸೋಲಿಸಿದರು.
ಪೈಪರ್ಸ್ಗೆ ಟ್ರಿವೇಣಿ ಕಿಂಗ್ಸ್ ಆಘಾತ
ದಿನದ ಮತ್ತೊಂದು ಪ್ರಮುಖ ಪಂದ್ಯದಲ್ಲಿ ಆಲ್ಪೈನ್ ಎಪಿಎಲ್ ಪೈಪರ್ಸ್ ವಿರುದ್ಧ ಟ್ರಿವೇಣಿ ಕಾಂಟಿನೆಂಟಲ್ ಕಿಂಗ್ಸ್ ಭರ್ಜರಿ ಪ್ರದರ್ಶನ ನೀಡಿತು. ನಾಲ್ಕು ಪಂದ್ಯಗಳಲ್ಲಿ ಕೇವಲ ಒಂದು ಗೆಲುವು ದಾಖಲಿಸಿದ್ದ ಟ್ರಿವೇಣಿ ತಂಡವು ಟೇಬಲ್ ಟಾಪರ್ಗಳಾಗಿದ್ದ ಪೈಪರ್ಸ್ಗೆ 10-4 ಅಂತರದ ಸೋಲುಣಿಸಿತು.
ಅರವಿಂದ್ ಚಿತ್ತಂಬರಂ ಅವರು ವಿದಿತ್ ಗುಜರಾತಿ ಅವರನ್ನು 56 ನಡೆಗಳಲ್ಲಿ ಸೋಲಿಸಿದರೆ, ಪ್ರಣವ್ ವಿ. ಅವರು ವೊಲೊಡಾರ್ ಮುರ್ಜಿನ್ ಅವರನ್ನು 63 ನಡೆಗಳ ಹೋರಾಟದ ಬಳಿಕ ಮಣಿಸಿದರು.
ಪೈಪರ್ಸ್–ಚೆಕ್ ಮುಂಬಾ ಸಮಬಲದ ಪೈಪೋಟಿ
ಇದಕ್ಕೂ ಮುನ್ನ ಚೆಕ್ ಮುಂಬಾ ಮಾಸ್ಟರ್ಸ್ ತಂಡವು ಫಯರ್ಸ್ ಅಮೆರಿಕನ್ ಗ್ಯಾಂಬಿಟ್ಸ್ ವಿರುದ್ಧ 11-6 ಅಂತರದ ಗೆಲುವು ಸಾಧಿಸಿತು. ಶಖ್ರಿಯಾರ್ ಮಮೆದ್ಯಾರೋವ್ ಅವರು ದಾನಿಲ್ ಡುಬೋವ್ ಅವರನ್ನು 42 ನಡೆಗಳಲ್ಲಿ ಮಣಿಸಿದರು. ಕರಿಸ್ಸಾ ಯಿಪ್ ಅವರು ಸಾರಾ ಖಾದೆಮ್ ವಿರುದ್ಧ ಗೆಲುವು ದಾಖಲಿಸಿದರು.
ಎಂ. ಪ್ರಣೇಶ್ ಅವರು ನಿಹಾಲ್ ಸರಿನ್ ವಿರುದ್ಧ ಉತ್ತಮ ಸ್ಥಿತಿಯಲ್ಲಿದ್ದರೂ, ಸಂಭವನೀಯ ಚೆಕ್ಮೇಟ್ ಅವಕಾಶವನ್ನು ಗಮನಿಸದೆ ದಾಳಿ ಮುಂದುವರಿಸಿ 55ನೇ ನಡೆಯಲ್ಲೇ ಸೋಲು ಕಂಡರು.
ಅಗ್ರಸ್ಥಾನಕ್ಕೆ ತೀವ್ರ ಪೈಪೋಟಿ
ಮಧ್ಯಂತರ ಹಂತದಲ್ಲಿ ಆಲ್ಪೈನ್ ಎಪಿಎಲ್ ಪೈಪರ್ಸ್ ಮತ್ತು ಚೆಕ್ ಮುಂಬಾ ಮಾಸ್ಟರ್ಸ್ ತಲಾ 9 ಪಂದ್ಯ ಅಂಕಗಳು ಹಾಗೂ 47 ಗೇಮ್ ಅಂಕಗಳೊಂದಿಗೆ ಮುನ್ನಡೆ ಸಾಧಿಸಿವೆ. ಪರಸ್ಪರ ಪಂದ್ಯದಲ್ಲಿ ಗೆಲುವು ದಾಖಲಿಸಿರುವ ಕಾರಣ ಪೈಪರ್ಸ್ ಅಗ್ರಸ್ಥಾನದಲ್ಲಿದೆ. ಗಂಗಾ ಗ್ರ್ಯಾಂಡ್ಮಾಸ್ಟರ್ಸ್ ಕೂಡ 9 ಪಂದ್ಯ ಅಂಕಗಳೊಂದಿಗೆ ಮೂರನೇ ಸ್ಥಾನದಲ್ಲಿದ್ದು, ಅಗ್ರಸ್ಥಾನಕ್ಕಾಗಿ ಪೈಪೋಟಿ ಇನ್ನಷ್ಟು ತೀವ್ರವಾಗಿದೆ.
ಸೆ. 9ರ ಪಂದ್ಯಗಳು
- 3:30 PM: ಚೆಕ್ ಮುಂಬಾ ಮಾಸ್ಟರ್ಸ್ vs ಆಲ್ಪೈನ್ ಎಪಿಎಲ್ ಪೈಪರ್ಸ್
- 5:00 PM: ಗಂಗಾ ಗ್ರ್ಯಾಂಡ್ಮಾಸ್ಟರ್ಸ್ vs ಟ್ರಿವೇಣಿ ಕಾಂಟಿನೆಂಟಲ್ ಕಿಂಗ್ಸ್
- 6:30 PM: ಪಿಬಿಜಿ ಅಲಾಸ್ಕನ್ ನೈಟ್ಸ್ vs ಚೆಕ್ ಮುಂಬಾ ಮಾಸ್ಟರ್ಸ್
- 8:00 PM: ಟ್ರಿವೇಣಿ ಕಾಂಟಿನೆಂಟಲ್ ಕಿಂಗ್ಸ್ vs ಫಯರ್ಸ್ ಅಮೆರಿಕನ್ ಗ್ಯಾಂಬಿಟ್ಸ್
ಟೆಕ್ ಮಹೀಂದ್ರಾ ಮತ್ತು ಫಿಡೆ ಜಂಟಿಯಾಗಿ ಆಯೋಜಿಸುವ ಗ್ಲೋಬಲ್ ಚೆಸ್ ಲೀಗ್ ವಿಶ್ವದ ಮೊದಲ ಹಾಗೂ ಅತಿದೊಡ್ಡ ಅಧಿಕೃತ ಫ್ರಾಂಚೈಸಿ ಚೆಸ್ ಲೀಗ್ ಆಗಿದೆ. ಪುರುಷ ಮತ್ತು ಮಹಿಳಾ ಆಟಗಾರರು ಒಂದೇ ತಂಡದಲ್ಲಿ ಆಡುವ ಈ ಲೀಗ್ನ ನಾಲ್ಕನೇ ಆವೃತ್ತಿ ಬೆಂಗಳೂರಿನಲ್ಲಿ ನಡೆಯುತ್ತಿದ್ದು, ಇದಕ್ಕೂ ಮುನ್ನ ದುಬೈ, ಲಂಡನ್ ಮತ್ತು ಮುಂಬೈನಲ್ಲಿ ಲೀಗ್ನ ಪಂದ್ಯಗಳು ನಡೆದಿದ್ದವು.
