ಬೆಂಗಳೂರು, ಸೆಪ್ಟೆಂಬರ್ 23: ಬೆಂಗಳೂರಿನಲ್ಲಿ ಸೆಪ್ಟೆಂಬರ್ 24ರಿಂದ 27ರವರೆಗೆ ಬೆಂಗಳೂರು ಡಿಸೈನ್ ವೀಕ್ 2026 (BDW26) ನಡೆಯಲಿದೆ. ವರ್ಲ್ಡ್ ಡಿಸೈನ್ ಪ್ರೊಟೋಪೊಲಿಸ್ (WDP)ಯ ಪ್ರಮುಖ ಕಾರ್ಯಕ್ರಮವಾದ ಈ ಸಮಾವೇಶವು ಸುಸ್ಥಿರ, ಪ್ರತಿರೋಧಶೀಲ ಮತ್ತು ವಿನ್ಯಾಸಾಧಾರಿತ ಮಹಾನಗರವಾಗಿ ಬೆಂಗಳೂರಿನ ಅಭಿವೃದ್ಧಿಗೆ ಸಂಬಂಧಿಸಿದ ಹಲವು ವಿಚಾರಗಳನ್ನು ಚರ್ಚಿಸಲು ವೇದಿಕೆ ಒದಗಿಸಲಿದೆ.
ಈ ವರ್ಷದ ಆವೃತ್ತಿಯಲ್ಲಿ ಪ್ರೊಟೋಪೊಲಿಸ್ ಕಾನ್ಕ್ಲೇವ್, ಸಾರ್ವಜನಿಕ ಪ್ರದರ್ಶನ ಮತ್ತು ಚಲನಚಿತ್ರೋತ್ಸವ ಎಂಬ ಮೂರು ಪ್ರಮುಖ ವಿಭಾಗಗಳಿವೆ. WDPಯ ಮೊದಲ ವರ್ಷದ ಅನ್ವೇಷಣಾ ಕೇಂದ್ರಗಳಲ್ಲಿ ನಡೆದ ಅಧ್ಯಯನಗಳು, ವಿವಿಧ ಸಮುದಾಯಗಳು ಹಾಗೂ ನಗರ ಸಮಸ್ಯೆಗಳ ಕುರಿತು ನಡೆಸಿದ ಸಂಶೋಧನೆಗಳು ಮತ್ತು ಸರ್ಕಾರ, ಸಂಸ್ಥೆಗಳು, ಉದ್ಯಮ ಹಾಗೂ ನಾಗರಿಕರ ನಡುವೆ ಬೆಳೆದ ಸಹಕಾರದ ಫಲಿತಾಂಶಗಳನ್ನು ಈ ಕಾರ್ಯಕ್ರಮದಲ್ಲಿ ಪರಿಚಯಿಸಲಾಗುತ್ತದೆ.
ಪ್ರೊಟೋಪೊಲಿಸ್ ಕಾನ್ಕ್ಲೇವ್
ಸೆಪ್ಟೆಂಬರ್ 24 ಮತ್ತು 25ರಂದು ಐಐಎಸ್ಸಿ ಜೆಎನ್ ಟಾಟಾ ಆಡಿಟೋರಿಯಂನಲ್ಲಿ ಪ್ರೊಟೋಪೊಲಿಸ್ ಕಾನ್ಕ್ಲೇವ್ ನಡೆಯಲಿದೆ. ವಿನ್ಯಾಸಕರು, ನಗರ ಸಂಶೋಧಕರು, ನೀತಿ ನಿರ್ಧಾರಕರು ಮತ್ತು ಅಂತರರಾಷ್ಟ್ರೀಯ ಪ್ರತಿನಿಧಿಗಳು ಪ್ಲೀನರಿ ಅಧಿವೇಶನಗಳು, ಗುಂಪು ಚರ್ಚೆಗಳು ಹಾಗೂ ಕಾರ್ಯಾಗಾರಗಳಲ್ಲಿ ಭಾಗವಹಿಸಲಿದ್ದಾರೆ.
ಕಾನ್ಕ್ಲೇವ್ನಲ್ಲಿ WDPಯ ಆರು ಪ್ರಮುಖ ವಿಷಯಗಳಾದ ಸಸ್ಟೇನಬಲ್ ಬಿಎಲ್ಆರ್, ಫ್ಯೂಚರ್ ನೌ ಬಿಎಲ್ಆರ್, ಎಂಟರ್ಪ್ರೈಸಿಂಗ್ ಬಿಎಲ್ಆರ್, ಕ್ರಿಯೇಟಿವ್ ಬಿಎಲ್ಆರ್, ಸೇಫ್ ಬಿಎಲ್ಆರ್ ಮತ್ತು ಬಿಲ್ಡ್ ಬಿಎಲ್ಆರ್ ಕುರಿತು ಚರ್ಚೆಗಳು ನಡೆಯಲಿವೆ.
ನಗರ ಆಡಳಿತ ಮತ್ತು ನಾಗರಿಕರ ಪಾಲ್ಗೊಳ್ಳುವಿಕೆ, ಪಾದಚಾರಿ ಸ್ನೇಹಿ ರಸ್ತೆಗಳು, ತ್ಯಾಜ್ಯ ನಿರ್ವಹಣೆ, ಬೆಂಗಳೂರಿನ ಕೆರೆಗಳು ಮತ್ತು ಜಲಾನಯನ ಪ್ರದೇಶಗಳು, ಬಿಸಿಗಾಳಿ ಹಾಗೂ ವಾಯು ಗುಣಮಟ್ಟದಿಂದ ಉಂಟಾಗುವ ಸವಾಲುಗಳು ಸೇರಿದಂತೆ ಹಲವು ನಗರ ಸಮಸ್ಯೆಗಳು ಅಧಿವೇಶನಗಳ ಕೇಂದ್ರವಾಗಲಿವೆ. ಜಪಾನ್-ಭಾರತ ವಿನ್ಯಾಸ ಸಹಕಾರ, ಸಾರ್ವಜನಿಕ ಹಸಿರು ಪ್ರದೇಶಗಳು, ನಗರ ಪರಿಸರ ವ್ಯವಸ್ಥೆ, ಆಡಳಿತ ಮತ್ತು ಪ್ರತಿರೋಧಶೀಲತೆಯ ವಿನ್ಯಾಸ ಹಾಗೂ ಪುಣೆಯಲ್ಲಿ ವೇಗದ ಹಂತದ ಸಾರಿಗೆ ಮಾರ್ಗಗಳ ಅನುಷ್ಠಾನ ಕುರಿತ ಅಧಿವೇಶನಗಳೂ ನಡೆಯಲಿವೆ.
ಚಲನಚಿತ್ರೋತ್ಸವ
ಕಾನ್ಕ್ಲೇವ್ ಜೊತೆಯಲ್ಲೇ ಸೆಪ್ಟೆಂಬರ್ 24 ಮತ್ತು 25ರಂದು ಜೆಎನ್ ಟಾಟಾ ಆಡಿಟೋರಿಯಂನಲ್ಲಿ ಚಲನಚಿತ್ರೋತ್ಸವವೂ ನಡೆಯಲಿದೆ. ನೀರು, ತ್ಯಾಜ್ಯ, ಸಂಚಾರ ವ್ಯವಸ್ಥೆ ಮತ್ತು ನಗರ ಪ್ರತಿರೋಧಶೀಲತೆ ಸೇರಿದಂತೆ ನಗರ ಜೀವನಕ್ಕೆ ಸಂಬಂಧಿಸಿದ ವಿಷಯಗಳ ಕುರಿತು ಸಾಕ್ಷ್ಯಚಿತ್ರಗಳು, ಕಿರುಚಿತ್ರಗಳು, ವಿದ್ಯಾರ್ಥಿ ಚಿತ್ರಗಳು ಮತ್ತು ಪ್ರಯೋಗಾತ್ಮಕ ಚಿತ್ರಗಳನ್ನು ಪ್ರದರ್ಶಿಸಲಾಗುತ್ತದೆ.
‘ಲಿವಿಂಗ್ ಸಿಟಿ’ ಸಾರ್ವಜನಿಕ ಪ್ರದರ್ಶನ
‘ಲಿವಿಂಗ್ ಸಿಟಿ’ ಸಾರ್ವಜನಿಕ ಪ್ರದರ್ಶನವು ಸೆಪ್ಟೆಂಬರ್ 26 ಮತ್ತು 27ರಂದು ವೆಂಕಟಪ್ಪ ಆರ್ಟ್ ಗ್ಯಾಲರಿಯಲ್ಲಿ ನಡೆಯಲಿದೆ. ಪ್ರದರ್ಶನವು ಐದು ಹಂತಗಳ ಮೂಲಕ ನಗರದ ವಿವಿಧ ಸಾಧ್ಯತೆಗಳನ್ನು ಪರಿಚಯಿಸಲಿದೆ.
- ಕ್ಯಾಪಬಿಲಿಟಿ ವಿಭಾಗದಲ್ಲಿ ನಗರದಲ್ಲಿ ಕಾರ್ಯನಿರ್ವಹಿಸುತ್ತಿರುವ ವ್ಯಕ್ತಿಗಳು ಮತ್ತು ಸಂಸ್ಥೆಗಳ ಪಾತ್ರವನ್ನು ಪರಿಚಯಿಸಲಾಗುತ್ತದೆ.
- ಡೆಮಾನ್ಸ್ಟ್ರೇಷನ್ ವಿಭಾಗದಲ್ಲಿ ಈಗಾಗಲೇ ಪೂರ್ಣಗೊಂಡ ಯೋಜನೆಗಳನ್ನು ಪ್ರದರ್ಶಿಸಲಾಗುತ್ತದೆ.
- ಅಪರ್ಚುನಿಟಿ ವಿಭಾಗವು ಸಾಮರ್ಥ್ಯ ಮತ್ತು ಕಾರ್ಯರೂಪದ ನಡುವಿನ ಸಂಪರ್ಕವಾಗಿ ವರ್ಲ್ಡ್ ಡಿಸೈನ್ ಪ್ರೊಟೋಪೊಲಿಸ್ ಕಾರ್ಯಕ್ರಮವನ್ನು ಪರಿಚಯಿಸುತ್ತದೆ.
- ಡಿಸ್ಕವರಿ ವಿಭಾಗದಲ್ಲಿ WDPಯ ಮೊದಲ ವರ್ಷದ ಮೂರು ಅನ್ವೇಷಣಾ ಸ್ಥಳಗಳ ವಿವರ ನೀಡಲಾಗುತ್ತದೆ.
- ಪಾಸಿಬಿಲಿಟಿ ವಿಭಾಗದಲ್ಲಿ ಸಾರ್ವಜನಿಕ ಮತದಾನ ಮತ್ತು ಸಂದರ್ಶಕರ ಅಭಿಪ್ರಾಯಗಳ ಮೂಲಕ ಸಂವಾದಾತ್ಮಕ ಅನುಭವ ಒದಗಿಸಲಾಗುತ್ತದೆ.
‘ಲಿವಿಂಗ್ ಸಿಟಿ’ ಪ್ರದರ್ಶನದ ನಂತರ ಇದೇ ಸ್ಥಳದಲ್ಲಿ ‘ಫೋಕ್ಲುರು’ ಕಾರ್ಯಕ್ರಮ ನಡೆಯಲಿದ್ದು, 2027ರಲ್ಲಿ ನಡೆಯಲಿರುವ ಭಾರತ-ಜಪಾನ್ ಕರಕುಶಲ ವಿನಿಮಯ ಕಾರ್ಯಕ್ರಮಕ್ಕೆ ಇದು ಮುನ್ನೋಟವಾಗಲಿದೆ. ಎರಡೂ ದೇಶಗಳ ಜವಳಿ ಮತ್ತು ಕರಕುಶಲ ಪರಂಪರೆಗಳ ಪ್ರದರ್ಶನದ ಜೊತೆಗೆ ವಿಶೇಷ ಸಹಯೋಗದ ಕೃತಿಗಳನ್ನೂ ಇಲ್ಲಿ ಪರಿಚಯಿಸಲಾಗುತ್ತದೆ.
ಉಚಿತ ಪ್ರವೇಶ
ಬೆಂಗಳೂರು ಡಿಸೈನ್ ವೀಕ್ 2026ರ ಕಾನ್ಕ್ಲೇವ್ ಮತ್ತು ಸಾರ್ವಜನಿಕ ಪ್ರದರ್ಶನಗಳಿಗೆ ಉಚಿತ ಪ್ರವೇಶವಿದ್ದು, ಭಾಗವಹಿಸಲು blrdesignweek.in ಮೂಲಕ ನೋಂದಣಿ ಮಾಡಿಕೊಳ್ಳಬಹುದು.
BDW26 ಕಾರ್ಯಕ್ರಮಕ್ಕೆ ಗ್ರೇಟರ್ ಬೆಂಗಳೂರು ಅಥಾರಿಟಿ (GBA) ಪ್ರಮುಖ ಹಣಕಾಸು ಪಾಲುದಾರರಾಗಿದ್ದು, ವರ್ಲ್ಡ್ ಡಿಸೈನ್ ಆರ್ಗನೈಸೇಶನ್ (WDO), ಅಸೋಸಿಯೇಷನ್ ಆಫ್ ಡಿಸೈನರ್ಸ್ ಆಫ್ ಇಂಡಿಯಾ (ADI) ಮತ್ತು ಸೃಷ್ಠಿ ಮಣಿಪಾಲ್ ಇನ್ಸ್ಟಿಟ್ಯೂಟ್ ಆಫ್ ಆರ್ಟ್, ಡಿಸೈನ್ ಅಂಡ್ ಟೆಕ್ನಾಲಜಿ (SMI) ಸಹ ಬೆಂಬಲ ನೀಡುತ್ತಿವೆ. RV ಯೂನಿವರ್ಸಿಟಿ, ವೀ ಸ್ಕೂಲ್ ಮತ್ತು ಪ್ರೆಸಿಡೆನ್ಸಿ ಯೂನಿವರ್ಸಿಟಿಯೂ ಕಾರ್ಯಕ್ರಮಕ್ಕೆ ಬೆಂಬಲ ನೀಡುತ್ತಿವೆ.
