ಅಹಮದಾಬಾದ್: ಭಾರತ ಪುರುಷರ ಕಬಡ್ಡಿ ತಂಡವು ಮೊದಲ ಕಾಮನ್‌ವೆಲ್ತ್ ಕಬಡ್ಡಿ ಚಾಂಪಿಯನ್‌ಶಿಪ್ 2026ರ ಪುರುಷರ ವಿಭಾಗದಲ್ಲಿ ಚಾಂಪಿಯನ್ ಆಗಿ ಹೊರಹೊಮ್ಮಿದೆ. ಫೈನಲ್‌ನಲ್ಲಿ ಶ್ರೀಲಂಕಾವನ್ನು 54-20 ಅಂತರದಿಂದ ಭರ್ಜರಿಯಾಗಿ ಮಣಿಸಿ ಪ್ರಶಸ್ತಿ ಗೆದ್ದ ಭಾರತ, ಇದೇ ಸಂಜೆ ನಡೆದ ಮಹಿಳಾ ಫೈನಲ್‌ನಲ್ಲಿ ಉಗಾಂಡಾವನ್ನು 35-15ರಿಂದ ಸೋಲಿಸಿದ್ದ ಮಹಿಳಾ ತಂಡದ ಜೊತೆಗೆ ಡಬಲ್ ಸಾಧನೆ ಮಾಡಿದೆ.
ಆದಿತ್ಯ ಶಿಂಧೆ ಸೂಪರ್ 10 ದಾಖಲಿಸಿ ಭಾರತದ ಅಗ್ರ ಸ್ಕೋರರ್ ಆಗಿದ್ದರು. ಅವರು 14 ರೈಡ್‌ಗಳಿಂದ ನಾಲ್ಕು ಬೋನಸ್ ಅಂಕಗಳನ್ನು ಒಳಗೊಂಡಂತೆ 10 ರೈಡ್ ಅಂಕಗಳನ್ನು ಗಳಿಸಿದರು. ಭರತ್ ಹೂಡಾ ಎಂಟು ರೈಡ್ ಅಂಕಗಳನ್ನು (ಎಲ್ಲವೂ ದ್ವಿತೀಯಾರ್ಧದಲ್ಲಿ) ಸೇರಿಸಿದ್ದು, ಏಳು ರೈಡ್‌ಗಳಲ್ಲಿ ಒಮ್ಮೆಯೂ ಟ್ಯಾಕಲ್ ಆಗಲಿಲ್ಲ. ಪಂಕಜ್ ಮೊಹಿತೆ ಆರು ಅಂಕಗಳು, ಉಪನಾಯಕ ನವೀನ್ ಕುಮಾರ್ ಐದು ಅಂಕಗಳು ಕೊಡುಗೆ ನೀಡಿದರು.
ರಕ್ಷಣಾ ವಿಭಾಗದಲ್ಲಿ ಯೋಗೇಶ್ ದಹಿಯಾ ಹೈ 5 ದಾಖಲಿಸಿ ಮುನ್ನಡೆಸಿದರು. ಅವರು ಮೊದಲಾರ್ಧದಲ್ಲೇ ಐದು ಪ್ರಯತ್ನಗಳಲ್ಲಿ ಐದು ಯಶಸ್ವಿ ಟ್ಯಾಕಲ್‌ಗಳನ್ನು ಮಾಡಿದರು. ಶುಭಂ ಶಿಂಧೆ, ನಾಯಕ ಸುರ್ಜೀತ್ ಸಿಂಗ್, ಪ್ರವೇಶ್ ಮಲಿಕ್ ಮತ್ತು ದೀಪಕ್ ಸಂಕರ್ ತಲಾ ಎರಡು ಟ್ಯಾಕಲ್ ಅಂಕಗಳನ್ನು ಸೇರಿಸಿದರು. ಭಾರತ ಒಟ್ಟು 30 ರೈಡ್ ಅಂಕಗಳು ಮತ್ತು 14 ಟ್ಯಾಕಲ್ ಅಂಕಗಳನ್ನು ಗಳಿಸಿ, ನಾಲ್ಕು ಆಲ್‌ಔಟ್‌ಗಳನ್ನು ಹೇರಿತು. ತಂಡ ಒಂದೇ ಒಂದು ಆಲ್‌ಔಟ್‌ಗೆ ಒಳಗಾಗಲಿಲ್ಲ.
ಶ್ರೀಲಂಕಾ ಪರ ಮಡುವಂತ ಎರಡು ಸೂಪರ್ ಟ್ಯಾಕಲ್‌ಗಳನ್ನು ಒಳಗೊಂಡಂತೆ ಆರು ಟ್ಯಾಕಲ್ ಅಂಕಗಳೊಂದಿಗೆ ಅಗ್ರ ಸ್ಕೋರರ್ ಆಗಿದ್ದರು. ಅನ್ಸಾಫ್ ಮತ್ತು ವಿಧುರಂಗ ತಲಾ ಮೂರು ಅಂಕಗಳನ್ನು ಗಳಿಸಿದರು. ಶ್ರೀಲಂಕಾದ ರೈಡರ್‌ಗಳು ಪಂದ್ಯದುದ್ದಕ್ಕೂ ಹಿನ್ನಡೆ ಅನುಭವಿಸಿದರು. ಸೆಮಿಫೈನಲ್‌ನಲ್ಲಿ ಅಗ್ರ ಸ್ಕೋರರ್‌ಗಳಾಗಿದ್ದ ಸಬಿಹಾನ್, ಮಿಲಿಂದ ಚತುರಂಗ ಮತ್ತು ವಿಧುರಂಗ ಒಟ್ಟಾಗಿ 31 ರೈಡ್‌ಗಳಿಂದ ಕೇವಲ ಐದು ರೈಡ್ ಅಂಕಗಳನ್ನು ಮಾತ್ರ ಗಳಿಸಲು ಸಾಧ್ಯವಾಯಿತು. ಶ್ರೀಲಂಕಾ ಒಂಬತ್ತು ಡು-ಅರ್-ಡೈ ರೈಡ್‌ಗಳಲ್ಲಿ ಏಳರಲ್ಲಿ ವಿಫಲವಾಗಿ, ಒಟ್ಟು 11 ರೈಡ್ ಅಂಕಗಳು ಮತ್ತು ಒಂಬತ್ತು ಟ್ಯಾಕಲ್ ಅಂಕಗಳೊಂದಿಗೆ ಪಂದ್ಯ ಮುಗಿಸಿತು.
ಮೊದಲಾರ್ಧದಲ್ಲಿ 10 ನಿಮಿಷಗಳು ಬಾಕಿ ಇರುವಾಗಲೇ ಭಾರತ ಒಂದು ಆಲ್‌ಔಟ್ ಹೇರಿ 15-8 ಮುನ್ನಡೆ ಸಾಧಿಸಿತ್ತು. ನಂತರ 15-2 ಅಂತರದಿಂದ ಶ್ರೀಲಂಕಾವನ್ನು ಮೀರಿಸಿ, ಮೊದಲಾರ್ಧದ ಅಂತ್ಯಕ್ಕೆ 30-10ರ ಭದ್ರ ಮುನ್ನಡೆ ಪಡೆದುಕೊಂಡಿತು. ಮೊದಲಾರ್ಧದ ಕೊನೆಯ ಐದು ನಿಮಿಷಗಳಲ್ಲಿ ಎರಡನೇ ಆಲ್‌ಔಟ್‌ನ್ನೂ ದಾಖಲಿಸಿತು. ಮೊದಲಾರ್ಧದಲ್ಲಿ ಶ್ರೀಲಂಕಾ 21 ರೈಡ್‌ಗಳಲ್ಲಿ ಕೇವಲ ಎರಡು ಯಶಸ್ವಿ ರೈಡ್‌ಗಳನ್ನು ಮಾತ್ರ ಮಾಡಿತು. ಭಾರತದ ರಕ್ಷಣಾ ಆಟಗಾರರು 10 ಪ್ರಯತ್ನಗಳಲ್ಲಿ ಒಂಬತ್ತು ಯಶಸ್ವಿ ಟ್ಯಾಕಲ್‌ಗಳನ್ನು ಮಾಡಿದರು.
ವಿರಾಮದ ಬಳಿಕ ಭಾರತ ಇನ್ನೂ ಎರಡು ಆಲ್‌ಔಟ್‌ಗಳನ್ನು ಹೇರಿತು. ಕೊನೆಯದು ಪಂದ್ಯ ಮುಗಿಯಲು ಐದು ನಿಮಿಷಗಳು ಬಾಕಿ ಇರುವಾಗ ಬಂದಿತು. ದ್ವಿತೀಯಾರ್ಧವನ್ನು ಭಾರತ 24-10ರಿಂದ ತನ್ನದಾಗಿಸಿಕೊಂಡಿತು. ಇಡೀ ಪಂದ್ಯದಲ್ಲಿ ಭಾರತ 40 ರೈಡ್‌ಗಳಲ್ಲಿ 24 ಯಶಸ್ವಿ ರೈಡ್‌ಗಳನ್ನು ದಾಖಲಿಸಿದರೆ, ಶ್ರೀಲಂಕಾ 41 ರೈಡ್‌ಗಳಲ್ಲಿ ಕೇವಲ ಏಳು ಯಶಸ್ವಿ ರೈಡ್‌ಗಳನ್ನು ಮಾತ್ರ ಮಾಡಿತು.
ಪಂದ್ಯದ ಬಳಿಕ ಮಾತನಾಡಿದ ಆದಿತ್ಯ ಶಿಂಧೆ, “ಹೆಚ್ಚು ಹೆಚ್ಚು ಟೂರ್ನಿಗಳು ನಡೆಯುತ್ತಿರುವುದು ಅಹಮದಾಬಾದ್‌ನ ಜನರಿಗೂ ಉತ್ತಮ ವಿಷಯವಾಗಿದೆ. ಇಲ್ಲಿನ ಜನರಿಂದ ನಮಗೆ ಅಪಾರ ಬೆಂಬಲ ದೊರೆಯಿತು. ಮುಂದಿನ ಸ್ಪರ್ಧೆಗಳಲ್ಲಿಯೂ ಎಲ್ಲರೂ ಇದೇ ರೀತಿ ನಮ್ಮನ್ನು ಬೆಂಬಲಿಸಲು ಬರುತ್ತಾರೆ ಎಂದು ನಾವು ಆಶಿಸುತ್ತೇವೆ. ಸಂಭ್ರಮಾಚರಣೆ ತುಂಬಾ ದೊಡ್ಡ ಮಟ್ಟದಲ್ಲಿರುತ್ತದೆ ಮತ್ತು ಅದರ ಸಂಭ್ರಮ ಈಗಾಗಲೇ ಇಲ್ಲಿ ಆರಂಭವಾಗಿದೆ!” ಎಂದು ಹೇಳಿದರು.
ಭಾರತ ಈ ಪ್ರಶಸ್ತಿ ಗೆಲುವಿನೊಂದಿಗೆ ಎಂಟರಲ್ಲಿ ಎಂಟು ಪಂದ್ಯಗಳನ್ನು ಗೆದ್ದ ಪರಿಪೂರ್ಣ ಅಭಿಯಾನವನ್ನು ಪೂರ್ಣಗೊಳಿಸಿದೆ. ‘ಎ’ ಗುಂಪಿನಲ್ಲಿ ಆರು ಗೆಲುವುಗಳೊಂದಿಗೆ ಅಗ್ರಸ್ಥಾನ ಪಡೆದಿದ್ದ ತಂಡವು ಇಂಗ್ಲೆಂಡ್ (46-26), ಉಗಾಂಡಾ (44-30), ಮಲೇಶಿಯಾ (37-23), ನೈಜೀರಿಯಾ (50-23), ತಾಂಜಾನಿಯಾ (48-20) ಮತ್ತು ಶ್ರೀಲಂಕಾ (45-24) ವಿರುದ್ಧ ಗೆದ್ದಿತ್ತು. ಸೆಮಿಫೈನಲ್‌ನಲ್ಲಿ ಬಾಂಗ್ಲಾದೇಶವನ್ನು 56-27ರಿಂದ ಮತ್ತು ಫೈನಲ್‌ನಲ್ಲಿ ಶ್ರೀಲಂಕಾವನ್ನು 54-20ರಿಂದ ಸೋಲಿಸಿತು. ಟೂರ್ನಿಯುದ್ದಕ್ಕೂ ಭಾರತ 380 ಅಂಕಗಳನ್ನು ಗಳಿಸಿ, ಕೇವಲ 193 ಅಂಕಗಳನ್ನು ಮಾತ್ರ ಬಿಟ್ಟುಕೊಟ್ಟಿದೆ. ಭಾರತದ ವಿರುದ್ಧ ಯಾವುದೇ ತಂಡ 30ಕ್ಕೂ ಹೆಚ್ಚು ಅಂಕಗಳನ್ನು ದಾಖಲಿಸಲು ಸಾಧ್ಯವಾಗಲಿಲ್ಲ.
