ಬೆಂಗಳೂರು: ಕರ್ನಾಟಕದ ರೈತರ ಬೆಳೆಗಳ ಕಟಾವಿನ ನಂತರದ ನಷ್ಟವನ್ನು ತಗ್ಗಿಸಿ, ಆಹಾರ ಸಂರಕ್ಷಣೆಯ ಮೂಲಕ ವ್ಯರ್ಥವನ್ನು ತಡೆಯುವುದರೊಂದಿಗೆ ರೈತರ ಆದಾಯವನ್ನು ಹೆಚ್ಚಿಸುವ ಗುರಿಯೊಂದಿಗೆ ರಾಜ್ಯ ಸರ್ಕಾರ ‘ಸಂಪೂರ್ಣ ಗ್ರ್ಯಾಂಡ್ ಚಾಲೆಂಜ್ 2026’ ಅನ್ನು ಹಮ್ಮಿಕೊಂಡಿದೆ ಎಂದು ಸರ್ಕಾರದ ಮುಖ್ಯ ಕಾರ್ಯದರ್ಶಿ ಡಾ. ಶಾಲಿನಿ ರಜನೀಶ್ ತಿಳಿಸಿದರು.
ಇಂದು ವಿಧಾನಸೌಧದಲ್ಲಿ ನಡೆದ ‘ಸಂಪೂರ್ಣ ಗ್ರ್ಯಾಂಡ್ ಚಾಲೆಂಜ್ 2026’ ಸಭೆಯ ಅಧ್ಯಕ್ಷತೆ ವಹಿಸಿ ಮಾತನಾಡಿದ ಅವರು, ಕರ್ನಾಟಕ ಸರ್ಕಾರದ ನಾವೀನ್ಯತಾ ಉಪಕ್ರಮವಾದ ಈ ಕಾರ್ಯಕ್ರಮದ ಮೂಲಕ ಆರು ನಾವೀನ್ಯತಾ ಪರಿಹಾರಗಳನ್ನು ಅಂತಿಮಗೊಳಿಸಲಾಗಿದೆ ಎಂದು ಹೇಳಿದರು. ಈ ಪರಿಹಾರಗಳು ಮುಂದಿನ ಹಂತದಲ್ಲಿ ಸರ್ಕಾರಿ, ಮಾರುಕಟ್ಟೆ ಮತ್ತು ಹೂಡಿಕೆ ಸಂಪರ್ಕಗಳನ್ನು ಪಡೆದುಕೊಳ್ಳಲಿವೆ ಎಂದು ಅವರು ತಿಳಿಸಿದರು.
ಉನ್ನತ ಮಟ್ಟದ ಸ್ಟೀರಿಂಗ್ ಸಮಿತಿಯ ಈ ಸಭೆಯಲ್ಲಿ ಭಾರತದಾದ್ಯಂತದ ಆಹಾರ ಮತ್ತು ಪಾನೀಯ, ಅಗ್ರಿಟೆಕ್, ಕೃಷಿ-ವ್ಯಾಪಾರ, ಪರಿಸರ ವಿಜ್ಞಾನ ಹಾಗೂ ಲೋಕೋಪಕಾರಿ ಕ್ಷೇತ್ರಗಳ ಹಿರಿಯ ಮಾರುಕಟ್ಟೆ ನಾಯಕರು ಭಾಗವಹಿಸಿದ್ದರು.
‘ಸಂಪೂರ್ಣ 2026’ ವೇದಿಕೆಯ ಭಾಗವಾಗಿ ಕರ್ನಾಟಕ ಸರ್ಕಾರದ ದೂರದೃಷ್ಟಿ ಮತ್ತು ಮಾರ್ಗದರ್ಶನದಲ್ಲಿ ಈ ಉಪಕ್ರಮವನ್ನು ನಡೆಸಲಾಗುತ್ತಿದೆ. ನಾವೀನ್ಯಕಾರರು, ಉದ್ಯಮಿಗಳು, ಸಂಶೋಧಕರು, ಹೂಡಿಕೆದಾರರು ಮತ್ತು ಸರ್ಕಾರಿ ಸಂಸ್ಥೆಗಳನ್ನು ಒಂದೆಡೆ ಸೇರಿಸಿ ಆಹಾರ ನಷ್ಟದ ಸಮಸ್ಯೆಯನ್ನು ಬೃಹತ್ ಮಟ್ಟದಲ್ಲಿ ಪರಿಹರಿಸುವುದು ಇದರ ಮುಖ್ಯ ಉದ್ದೇಶವಾಗಿದೆ.
ಕರ್ನಾಟಕ ಸರ್ಕಾರದ ತೋಟಗಾರಿಕೆ ಮತ್ತು ರೇಷ್ಮೆ ಇಲಾಖೆಯ ಸರ್ಕಾರದ ಕಾರ್ಯದರ್ಶಿ ಶ್ರೀ ಆರ್. ಗಿರೀಶ್ ಐ.ಎ.ಎಸ್. ಅವರ ಬೆಂಬಲದೊಂದಿಗೆ ಈ ವೇದಿಕೆಯನ್ನು ರೂಪಿಸಲಾಗಿದೆ. ಕರ್ನಾಟಕದ ಕೃಷಿ ಮತ್ತು ತೋಟಗಾರಿಕೆ ಮೌಲ್ಯ ಸರಪಳಿಯಲ್ಲಿ ಆಹಾರ ನಷ್ಟ ಹಾಗೂ ಕಟಾವಿನ ನಂತರದ ಅಡಚಣೆಗಳನ್ನು ತಡೆಯಬಲ್ಲ ತಂತ್ರಜ್ಞಾನ ಆಧಾರಿತ ಮತ್ತು ತಂತ್ರಜ್ಞಾನೇತರ ಪರಿಹಾರಗಳನ್ನು ಗುರುತಿಸಲು ‘ಸಂಪೂರ್ಣ ಗ್ರ್ಯಾಂಡ್ ಚಾಲೆಂಜ್’ ಅನ್ನು ವಿನ್ಯಾಸಗೊಳಿಸಲಾಗಿದೆ.
ಆಹಾರ ನಷ್ಟವನ್ನು ಕೇವಲ ವ್ಯರ್ಥದ ಸಮಸ್ಯೆಯಾಗಿ ನೋಡದೆ, ರೈತ ಸಮುದಾಯದ ನೇರ ಆರ್ಥಿಕ ಸವಾಲಾಗಿ ಪರಿಗಣಿಸಿ ಪರಿಹಾರ ಕಂಡುಕೊಳ್ಳುವುದು ಸಂಪೂರ್ಣ ವೇದಿಕೆಯ ಪ್ರಮುಖ ಗುರಿಯಾಗಿದೆ. ಈ ನಷ್ಟವನ್ನು ಕಡಿಮೆ ಮಾಡುವ ಮೂಲಕ ರೈತರ ಉತ್ಪನ್ನಗಳ ಮೌಲ್ಯವನ್ನು ಕಾಪಾಡಿಕೊಳ್ಳಬಹುದು, ರೈತರ ಆದಾಯವನ್ನು ಬಲಪಡಿಸಬಹುದು ಮತ್ತು ಕೃಷಿ-ತೋಟಗಾರಿಕಾ ಆರ್ಥಿಕ ಲಾಭವನ್ನು ಹೆಚ್ಚಿಸಬಹುದು.
ಥಿಂಕ್ ಥ್ರೂ ಕನ್ಸಲ್ಟಿಂಗ್ ಸಂಸ್ಥಾಪಕಿ ಹಾಗೂ ಎಬಿಡಬ್ಲ್ಯುಸಿಐ ಪ್ರಧಾನ ಕಾರ್ಯದರ್ಶಿ ಡಾ. ಪರುಲ್ ಸೋನಿ ಮತ್ತು ಗೇನ್ ಭಾರತದ ದೇಶಿ ನಿರ್ದೇಶಕಿ ಡಾ. ಭುವನೇಶ್ವರಿ ಬಾಲಸುಬ್ರಮಣಿಯನ್ ಅವರು ಈ ಕಾರ್ಯಕ್ರಮದ ರೂಪುರೇಷೆಗಳನ್ನು ಸಿದ್ಧಪಡಿಸಿದ್ದಾರೆ. ಆವಿಷ್ಕಾರಗಳನ್ನು ಗುರುತಿಸುವುದರ ಜೊತೆಗೆ ಅವುಗಳನ್ನು ಸರ್ಕಾರದ ಯೋಜನೆಗಳಲ್ಲಿ ಅಳವಡಿಕೆ, ಮಾರುಕಟ್ಟೆ ಪ್ರವೇಶ ಮತ್ತು ಹೂಡಿಕೆ ಅವಕಾಶಗಳತ್ತ ಕೊಂಡೊಯ್ಯಲು ಈ ಕಾರ್ಯಕ್ರಮವು ವ್ಯವಸ್ಥಿತ ಮಾರ್ಗವನ್ನು ಒದಗಿಸುತ್ತದೆ.
ಕೃಷಿ-ಉದ್ಯಮಗಳು, ಎಫ್.ಪಿ.ಓ. ಸಂಬಂಧಿತ ಉದ್ಯಮಗಳು, ಶೈಕ್ಷಣಿಕ ಮತ್ತು ಸಂಶೋಧನಾ ಸಂಸ್ಥೆಗಳು, ಇನ್ಕ್ಯುಬೇಟರ್ಗಳು ಹಾಗೂ ಸರ್ಕಾರಿ ಸಂಸ್ಥೆಗಳನ್ನು ಒಳಗೊಂಡ ವ್ಯಾಪಕ ಸಂಪರ್ಕ ಅಭಿಯಾನದ ಮೂಲಕ ಈ ಗ್ರ್ಯಾಂಡ್ ಚಾಲೆಂಜ್ಗೆ ಒಟ್ಟು 210 ಅರ್ಜಿಗಳು ಸಲ್ಲಿಕೆಯಾಗಿದ್ದವು. ಈ ಪ್ರಚಾರ ಅಭಿಯಾನವು ಸುಮಾರು 1,062 ವ್ಯಕ್ತಿಗಳು ಮತ್ತು 442 ಸಾಂಸ್ಥಿಕ ಸಂಸ್ಥೆಗಳನ್ನು ತಲುಪಿದ್ದು, 10 ವೆಬಿನಾರ್ಗಳ ಮೂಲಕ 1,162 ನೋಂದಣಿಗಳು ಮತ್ತು 1,047 ಭಾಗವಹಿಸುವಿಕೆ ದಾಖಲಾಗಿದೆ.
ಸರ್ಕಾರ, ಶಿಕ್ಷಣ ಕ್ಷೇತ್ರ ಮತ್ತು ಹೂಡಿಕೆದಾರರನ್ನು ಒಳಗೊಂಡ 14 ಸದಸ್ಯರ ತಜ್ಞರ ಗುಂಪು ಮೌಲ್ಯಮಾಪನ ಪ್ರಕ್ರಿಯೆಯನ್ನು ನಡೆಸಿದೆ. ಆಯ್ಕೆಯಾದ ಆರು ಪರಿಹಾರಗಳನ್ನು ‘ಸಂಪೂರ್ಣ’ ಪರಿಸರ ವ್ಯವಸ್ಥೆಯ ಮೂಲಕ ಮುನ್ನಡೆಸಲಾಗುತ್ತಿದ್ದು, ಕರ್ನಾಟಕದಲ್ಲಿ ಇವುಗಳ ಅನುಷ್ಠಾನ ಮತ್ತು ವಿಸ್ತರಣೆಗಾಗಿ ಸರ್ಕಾರಿ ಬೆಂಬಲ, ಹೂಡಿಕೆದಾರರ ಸಂಪರ್ಕ ಮತ್ತು ಮಾರುಕಟ್ಟೆ ನಂಟು ಕಲ್ಪಿಸಲು ವಿಶೇಷ ಗಮನ ಹರಿಸಲಾಗುತ್ತದೆ.
ಈ ನಾವೀನ್ಯತಾ ವೇದಿಕೆಯು ನೈಜ ಜಗತ್ತಿನಲ್ಲಿ ಹೇಗೆ ಅನುಷ್ಠಾನಗೊಳ್ಳಲಿದೆ ಎಂಬುದರ ಕುರಿತು ಸ್ಟೀರಿಂಗ್ ಸಮಿತಿ ಸಭೆಯಲ್ಲಿ ಚರ್ಚಿಸಲಾಗಿದೆ. ‘ಸಂಪೂರ್ಣ ಗ್ರ್ಯಾಂಡ್ ಚಾಲೆಂಜ್ 2026’ ಕಾರ್ಯಕ್ರಮದ ಸಮಾರೋಪ ಸಮಾರಂಭವು ಅಕ್ಟೋಬರ್ 15ರಿಂದ 18ರವರೆಗೆ ಬೆಂಗಳೂರಿನ ಜಿ.ಕೆ.ವಿ.ಕೆ. ಕ್ಯಾಂಪಸ್ನಲ್ಲಿ ನಡೆಯಲಿರುವ ‘ಕೃಷಿಮೇಳ 2026’ರಲ್ಲಿ ಜರುಗಲಿದೆ. ಇಲ್ಲಿ ಆಯ್ಕೆಯಾದ ಪರಿಹಾರಗಳನ್ನು ಗೌರವಿಸಲಾಗುವುದು ಮತ್ತು ಸರ್ಕಾರಿ, ಮಾರುಕಟ್ಟೆ ಹಾಗೂ ಬಂಡವಾಳ ಕ್ಷೇತ್ರದ ಪ್ರಮುಖರೊಂದಿಗೆ ಸಂಪರ್ಕ ಕಲ್ಪಿಸಲಾಗುತ್ತದೆ.
ಸಂಪೂರ್ಣ 2026 ಕುರಿತು: ಸಂಪೂರ್ಣ 2026 ಎಂಬುದು ಕರ್ನಾಟಕ ಸರ್ಕಾರದ ಬೆಂಬಲದೊಂದಿಗೆ, ತೋಟಗಾರಿಕೆ ಮತ್ತು ರೇಷ್ಮೆ ಇಲಾಖೆಯ ಆಶ್ರಯದಲ್ಲಿ, GAIN ನ್ಯೂಟ್ರಿಷನ್ ಕನೆಕ್ಟ್, ಥಿಂಕ್ ಥ್ರೂ ಕನ್ಸಲ್ಟಿಂಗ್ ಮತ್ತು ABWCI ಸಹಯೋಗದೊಂದಿಗೆ ರೂಪುಗೊಂಡ ಬಹು-ಕ್ಷೇತ್ರದ ವೇದಿಕೆಯಾಗಿದೆ. ಇದು ಕೃಷಿ ಮತ್ತು ತೋಟಗಾರಿಕಾ ಮೌಲ್ಯ ಸರಪಳಿಯಲ್ಲಿ ನಾವೀನ್ಯತಾ ಪರಿಹಾರಗಳನ್ನು ವೇಗವಾಗಿ ಗುರುತಿಸಲು, ಅಳವಡಿಸಿಕೊಳ್ಳಲು ಮತ್ತು ವಿಸ್ತರಿಸಲು ಸಹಾಯ ಮಾಡುತ್ತದೆ.
ಕೃಷಿ ಮತ್ತು ತೋಟಗಾರಿಕಾ ಆಹಾರ ನಷ್ಟವನ್ನು ಕಡಿಮೆ ಮಾಡುವ, ರೈತರ ಆದಾಯವನ್ನು ರಕ್ಷಿಸುವ ಹಾಗೂ ಹವಾಮಾನ-ಸ್ಥಿತಿಸ್ಥಾಪಕ ಆಹಾರ ವ್ಯವಸ್ಥೆಗಳಿಗೆ ಕೊಡುಗೆ ನೀಡುವ ಪರಿಹಾರಗಳ ಮೇಲೆ ‘ಸಂಪೂರ್ಣ’ ವೇದಿಕೆಯು ಗಮನ ಕೇಂದ್ರೀಕರಿಸುತ್ತದೆ. ‘ಸಂಪೂರ್ಣ ಗ್ರ್ಯಾಂಡ್ ಚಾಲೆಂಜ್’ನಂತಹ ಉಪಕ್ರಮಗಳ ಮೂಲಕ, ಕಟಾವಿನ ನಂತರದ ಅಡಚಣೆಗಳಿಂದ ರೈತ ಸಮುದಾಯದ ಆದಾಯ ನಷ್ಟವಾಗುವುದನ್ನು ತಡೆಗಟ್ಟಿ, ಹೆಚ್ಚಿನ ಮೌಲ್ಯವನ್ನು ಉಳಿಸಿಕೊಳ್ಳಲು ಈ ವೇದಿಕೆ ಸಹಾಯ ಮಾಡುತ್ತದೆ.
ಈ ಉಪಕ್ರಮಕ್ಕೆ ಎಂಎಂ ಆ್ಯಕ್ಟಿವ್ ಸೈ-ಟೆಕ್ ಕಮ್ಯುನಿಕೇಷನ್ಸ್ ಮತ್ತು ಕೃಷಿ ಕಲ್ಪ ಫೌಂಡೇಶನ್ ಸಹಯೋಗಿ ಪಾಲುದಾರರಾಗಿ ಬೆಂಬಲ ನೀಡುತ್ತಿವೆ.
